Күүтүүлээх тэрээһини Дьокуускай куорат 202-с түөлбэтигэр тэрийдилэр.
Дьон-сэргэ болҕомтотун тардар тэрээһин уон биирис сылын өрө көтөҕүллүүлээхтик ыытылынна. Тэрээһин «Суор туһунан номоҕу» көрдөрүүттэн саҕаланна. Номоххо суор сырдыгы хайдах таһаарарын туһунан кэпсэнэрэ оҕолору ордук сэҥээрдэр, үөрдэр.
Салгыы эбээн норуотун сиэрин-туомун толорор бөлөх Михаил Едукин салайыытынан уот иччитигэр сүгүрүйүүнү көрдөрдүлэр. Уот иччитэ хотугу норуоттарга — сылааһы биэрэр, дьиэ кэргэни араҥаччылыыр.
Бырааһынньыкка мустубут дьону Ил Түмэн хотугу аҕыйах ахсааннаах төрүт олохтоох норуоттарын боппуруостарыгар уонна Арктика дьыалаларыгар сис кэмитиэтин бэрэссэдээтэлэ Елена Голомарева, Судаарыстыбаннай мунньах бэрэссэдээтэлин солбуйааччы Виктор Губарев, СӨ Тас сибээскэ уонна норуоттар дьыалаларыгар миниистир Гаврил Кириллин, А.Е.Кулаковскай аатынан норуоттар доҕордоһууларын дьиэтин генеральнай дириэктэрэ Антонида Корякина, Хотугу аҕыйах ахсааннаах төрүт олохтоох норуоттар Ассоциацияларын вице-бэрэсидьиэнэ Вячеслав Шадрин эҕэрдэлээтилэр.
Бырааһынньыгы А.Е.Кулаковскай аатынан норуоттар доҕордоһууларын дьиэтэ, аҕыйах ахсааннаах төрүт олохтоох норуоттар Ассоциациялара СӨ Тас сибээскэ уонна норуоттар дьыалаларыгар министиэристибэ өйөбүлүнэн тэрийэн ыыттылар.
А.Е.кулаковскай аатынан норуоттар доҕордоһууларын дьиэтин пресс-сулууспата