Айылҕа харыстабыла Сүрүн

Хотугу улуустар бөһүөлэктэрин ыраастыахтара

Хотугу улуустартан сүүрбэ тыһыынчаттан тахса туонна тимири ыраастыахтара. Бу туһунан Ил Дархан Айсен Николаев “Саха” НКИХ биэриитигэр ыам ыйынааҕы түмүгү таһаарарыгар бэлиэтээн эттэ.

“Ыраас Арктика” федеральнай бырайыагынан, Тиксии, Уус Куйга, Баатаҕай бөһүөлэктэрин ыраастааһын барыаҕа. Мантан барыта 20 тыһыынчатан тахса туонна тимири ыраастыыр былааннаахтар. Санатан эттэххэ, былырыын олохтоохтор уонна Оборуона министиэристибэтин үлэһиттэрин көмөтүнэн Тиксииттэн 300 туонна тимир ыраастаныллыбыта.

Бу бырайыак биһиги хотугу улуустарбытыгар суолтата улахан. Хомойуох иһин, кэлиҥҥи сылларга Арктикаҕа наһаа элбэх тимир мунньулунна. Былырыын РФ оборуонатын министиэристибэтин көмөтүнэн Тиксии бөһүөлэгиттэн “Өлүөнэтээҕи холбоһуктаах пароходство” хампаанньа суудуналарынан барыта 300 туонна тимири таспыппыт, – диэн иһитиннэрэр Айсен Николаев.

Манна даҕатан эттэххэ, бу бырайыак былырыыҥҥыттан саҕаламмыта. Манна СӨ Арктика сайдыытыгар, хотугу норуоттар дьыалаларыгар, Олох-дьаһах, коммунальнай хаһаайыстыба, энергетика министиэристибэлэрэ, РФ оборуонатын министиэристибэтэ, Булуҥ, Дьааҥы, Усуйаана улуустарын дьаһалтата, олохтоохторо, федеральнай бырайыак волонтердара кыттыыны ылалаллар. Бөһүөлэктэртэн хомуллубут тимирдэри “Өлүөнэтээҕи холбоһуктаах пароходство” суудуналарынан таһыаҕа.

Аграфена КУЗЬМИНА

0
0
Telegram @edersaas20