Бэс ыйын 2 күнүгэр Ил Түмэн Хотугу аҕыйах ахсааннаах норуоттар боппуруостарыгар уонна Арктика дьыалаларыгар, экэниэмикэ, инвестиция уонна бырамыысыланнас бэлиитикэтин сис кэмитиэттэрэ Федерация Сэбиэтин федеративнай тутулга, эрэгийиэннээҕи бэлиитикэҕэ, олохтоох салайыныыга уонна Хоту дойду дьыалаларыгар кэмитиэтин бэрэссэдээтэлин солбуйааччы Александр Акимов кыттыылаах холбоһуктаах мунньахтара буолла.
Мунньахха 2022 сылга хотугу улуустарга кыстык таһаҕаһын тиэйиигэ уонна Арктиканы аһынан-үөлүнэн хааччыйыыга бэлэмнэнии боппуруостарын көрдүлэр. Оробуочай кэпсэтиигэ норуот дьокутааттара, тустаах министиэристибэлэр уонна биэдэмистибэлэр салайааччылара, судаарыстыбаннай уорган бэрэстэбиитэллэрэ кыттыыны ыллылар.
Сенатор Александр Акимов баччааҥҥа диэри хотугу улуустарга кыһыҥҥы хасааһы тиэйиигэ көдьүүстээх кэлим үлэни ыытар тиһик оҥоһуллубакка турарын бэлиэтээтэ:
— Бүгүҥҥү күҥҥэ РФ 25 эрэгийиэнэ кыһыҥҥы кэмҥэ таһаҕас тиэйиитин бэйэлэрэ быһаара олороллор. Бэрэсидьиэн Владимир Путин муус устар 15 күнүгэр Арктика зонатын сайдыытын ырытарыгар хотугу тиэйии туһунан тустаах сокуону оҥорорго сорудахтаабыта. Бу сокуон тиэллиэхтээх куруус испииһэгиттэн саҕалаан, тиэйии былаанын, ыытыллар үлэ хонтуруолун барытын көрдөрүөхтээх. «Хотугу тиэйии» диэн өйдөбүл сокуонунан бигэргэниэхтээх. Тырааныспар, ыскылаат, пуорт кыамталара электроннай тиһигинэн ааҕыллыытын-суоттаныытын түмүгэр хотугу тиэйии сыыппаранан модела оҥоһуллуоҕа. Саамай уустук суоллаах-иистээх Саха сиригэр бу үлэ пилотнай бырайыак быһыытынан ыытыллар. Өскө үлэ ситиһиилээх буоллаҕына, уопут атастаһыытын быһыытынан Арктика зонатыгар барытыгар тарҕаныаҕа. Онон сокуон барылыгар этиилэри киллэрии соруга турар. Оҥоһуллуохтах сокуон сүрүн соруга — хотугу тиэйии федеральнай эппиэтинэскэ туруохтаах.
Елена ПОТОЦКАЯ, “Саха сирэ” хаһыат.
Хаартыска — Ил Түмэн саайтыттан.