2022 сылга Саха сиригэр сылы эргиччи үлэлиир «Хотугу сулус» Оҕо доруобуйатын бөҕөргөтөр киин аһыллыаҕа.
Оҕо эбии үөрэхтээһинин тэрилтэтэ Табаҕа тумуһугар киин куораттан 33 килэмиэтир тэйиччи сиргэ турар. Бу тэрилтэ аныгы сайдыылаах технология бары ирдэбилигэр олоҕуран, судаарыстыбаннай уонна чааһынай бииргэ үлэлээһин хайысхатынан тутуллар. Ыам ыйын 22 күнүгэр тутуу бу эбийиэгэр үлэ хаамыытын Ил Дархан Айсен Николаев тиийэн билистэ.
Тутааччылар киин сүрүн дьиэтин уонна оҕолор олорор дьиэлэрин тута сылдьаллар.
12 300 кв.м. иэннээх улахан эбийиэк 350 оҕо олорор түөрт корпустаах буолуоҕа. Маны тэҥэ манна спортивнай, мэдиссиинискэй уонна оҕо үөрэнэр, дьарыктанар блоктара тутулла тураллар. Кииҥҥэ оҕо идэтин талыыга көмөлөһөр кластер, видео-устуудьуйа, робототехника уонна 3D-моделирование кэбиниэттэрэ, вокальнай саала, киинэ тыйаардырдаах улахан аактабай саала баар буолуоҕа.
«Үлэ судаарыстыбаннай уонна чааһынай бииргэ үлэлээһин хайысхатынан ыытыллар буолан, эбийиэк тутуутун «Открытие» баан үбүлүүр. РФ Бэрэсидьиэнин Уһук Илиҥҥэ боломуочунайа Юрий Трутнев быһаарыытынан, Уһук Илин социальнай-экэнэмиичэскэй бырагырааматын чэрчитинэн Оҕо доруобуйатын бөҕөргөтөр киини тутууга федеральнай капитальнай грант бэриллибитэ. Сыл аайы «Хотугу сулус» кииҥҥэ өрөспүүбүлүкэ бары муннуктарыттан тыһыынчанан оҕо кэлэн, дойдуга тарҕатыллар ньыманан эбии үөрэхтээһин араас аныгы хайысхатыгар уһуйуллуоҕа», — диэн Айсен Николаев бэлиэтээтэ.
Тутуу былаһааккатын көрөн-истэн баран, Ил Дархан эһиил эбийиэк үлэҕэ киириэҕэ диэн эттэ. Кэнэҕэс «Хотугу сулус» Оҕо киинин баазатыгар Уһук Илиннээҕи оҕо сынньалаҥын оператора тэриллиэҕэ. Бу туһунан СИА иһитиннэрэр.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Андрей Сорокин түһэриитэ, СИА.