«Якутоптторг» хотугу улуустарга хортуоппуйу уонна оҕуруот аһын логистика саҥа ырычааҕынан таһан эрэр.
Бырабыыталыстыба Бэрэссэдээтэлэ Андрей Тарасенко логистика саҥа ырычааҕа хас биирдии киилэ таһаҕаска 400 солк. кэмчилиэҕэ диэтэ. Ити урукку логистика ырычааҕыттан үс төгүл чэпчэки буолан, Арктика дьоно-сэргэтэ бородууксуйаны Дьокуускай сыанатынан ылар кыахтаннылар.
– Урут кыһын Дьокуускайтан улуустар кииннэригэр диэри сөмөлүөтүнэн илдьэн баран, нэһилиэктэргэ бөртөлүөтүнэн таһаллара. Оттон билигин «Якутоптторг» баазатыттан улуустар кииннэригэр уу суолунан илдьиллиэҕэ, салгыы Ан-2 сөмөлүөттэр тиэрдиэхтэрэ, – диэн Андрей Тарасенко инстаграмҥа суруйда.
Билиҥҥи туругунан Дьааҥы эҥээр улуустарга (Усуйаанаҕа, Эбээн Бытантайга уонна Дьааҥыга) Ан-24 сөмөлүөт уон көтүүнү оҥордо. Усуйаана улууһугар Тумакка, Хайырга уонна Сайылыкка 6,291 туонна Астрахань уобалаһын эрдэтээҥи хортуоппуйа тиэрдилиннэ. Ити курдук, Кустуур, Дьарҕаалаах (Эбээн Бытантай) олохтоохторо 3,322 туонна, Улахан Күөл, Бала (Дьааҥы) олохтоохторо 2,188 туонна хортуоппуйу туттулар. Салгыы «күөх рейс» кыраапык быһыытынан, Индигир эҥээр улуустарга (Абыйга, Аллайыахаҕа, Муомаҕа) уонна үс Халыма улуустарыгар тиийиэҕэ. Онон, Арктикатааҕы аҕыс улууска, 32 нэһилиэнньэлээх пууҥҥа атырдьах уонна балаҕан ыйдарыгар 60 туонна хортуоппуй тиэрдиллиэҕэ. Хортуоппуйу таһынан боруобаҕа диэн, Узбекистантан аҕалыллыбыт оҕуруот аһа уонна фрукта илдьиллэр.
Ил Дархан Айсен Николаев Ил Түмэҥҥэ Анал этиитигэр Арктика улуустарыгар миэстэҕэ аһы-үөлү харайыыны итиэннэ нэһилиэнньэҕэ тиэрдиини хааччыйар эргиэн-логистика кииннэрин тэрийэргэ сорудахтаабыта. Бу туһунан Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова, «Саха сирэ», edersaas.ru