«Хотугу Синергия»: «Мин-Инженербин» куонкурус кыайыылааҕа массыынанан наҕараадаланыаҕа
Төрдүс төгүлүн ыытыллар Уһук Илиҥҥи “Мин–Инженербин” куонкурус “Эдэр инженер” уонна “Идэтийбит инженер” хайысхаларын кыайыылаахтарын алтынньы 30 күнүгэр Саха сирин инженердэрин сийиэстэригэр билиэхпит. Сүрүн бириис — Вячеслав Анатольевич Штыровтан массыына.
Куонкурус бастакы түһүмэҕэ кэтэхтэн, онтон иккиһэ «Хотугу Синергия» форум чэрчитинэн ыытылынна. Манна тоҕус бастыҥ бырайыактаах эдэр дьон үлэтин сыаналаатылар. Дьүүллүүр хамыыһыйаҕа инженердэр Саха сиринээҕи үрдүкү сэбиэттэрин чилиэннэрэ, тутуу, энэргиэтикэ, ОДьКХ, геологоразведка, сир баайын хостооһун, сибээс уонна информационнай технология инженердэрэ бааллар.
Дьокуускайдааҕы технологическай кэллиэс иккис кууруһун устудьуона Георгий Серегин күн батареятын барылын толкуйдаабыт. Бу оҥоһуу 70х90 кээмэйдээх, даачаҕа, айылҕаҕа илдьэ сылдьан, уотунан барар малы-салы иитэр. Оттон ХИФУ иккис кууруһун устудьуона Елизавета Данилова Саха сирин ирбэт тоҥуттан ылыллар гаас гидратыттан оттугу оҥорон таһаарыы туһунан бырайыактаах кэлбит. Эдэр инженер Дарья Васильева хоту сир усулуобуйаларыгар туһаныллар матырыйааллар туһунан бырайыагын көмүскээтэ. Бу барыта – “Эдэр инженер” хайысха кыттааччыларын үлэлэрэ.
“Идэтийбит инженердэр” хайысхаҕа эспиэрдэр алта бырайыагы көрдүлэр. Ол иһигэр Виталий Анофрев лазернай-фрейзернэй ыстаныагын, Илмаар Игнатьев «Super Vision» баһаартан систиэмэтин хайҕаатылар. Түмүккэ икки хайысханан тоҕус көрүллүбүт бырайыагы үһүс түһүмэххэ аһардылар.
— Куонкуруска кытта кэлбит инженердэр үлэлэрин барытын үрдүктүк сыаналаатыбыт, онон бүтэһик түһүмэххэ аһардыбыт. Биһиги бырайыак билигин тирээн турар кыһалҕаҕа эппиэттиирин, быраактыкаҕа туһаныллыытын сыаналаатыбыт, — диэн ХИФУ инженернэй-тиэхиньиичэскэй институтун дириэктэрэ, финал ½ түһүмэҕин эспиэрдиир хамыыһыйатын бэрэссэдээтэлэ Терентий Корнилов санаатын үллэһиннэ.
Финалга ааспыт үлэлээх инженердэр Вячеслав Штыров туруорбут сүрүн бирииһин – массыына иһин салгыы күрэхтэһиэхтэрэ.
“Мин-Инженербин” хайысхаҕа бырайыактаах кыттааччылар истэригэр куонкуруска Артур Николаев, Сардаана Тарабукина уонна Денис Иванов 80-нуу тыһыынча солк.уобай суумалаах граннар хаһаайыннарынан буоллулар.
Айтана Аммосова, «Саха сирэ» хаһыат, edersaas.ru