Эдэр дьон бэйэ дьыалатын саҕалыырыгар, дьарыктаах буолуутугар “Хотугу Синергия” форум төһүү күүс буолара саарбахтаммат. Бу форум Саха сиригэр быйыл төрдүс төгүлүн ыытылынна. Манна ыччат бырайыак көмүскээн, грант ылан, олоххо киллэрэр. Араас эйгэҕэ үлэлии-хамныы сылдьар эспиэрдэртэн сүбэ-ама ылар, уопут атастаһар. Грант сүүйэн, бырайыагын олоххо киллэрбит эдэр дьон туһунан тиһигин быспакка “Саха сирэ” хаһыакка, edersaas.ru сайтка сырдатабыт.
“Хотугу Синергия” атырдьах ыйын 21-25 күннэригэр Нам улууһун киинигэр, Олоҥхо ыһыаҕа ыытыллыбыт пааркатыгар, буолан ааста. Манна өрөспүүбүлүкэ 21 улууһуттан 181 ыччат муһунна. Быйылгы форум биэс хайысханан үлэлээтэ: “Мин — Инженербин” (салайааччы Владимир Аммосов), “Саха сирин лиидэрдэрэ” (салайааччы Василина Лукина), “Биһиги доброволецтарбыт” (салайааччы Айыллаан Винокуров), “Профlife” (салайааччы Ирина Бурцева) уонна “Арктика ыччата” (салайааччы Раиса Контоева).
Ил Дархан уонна Бырабыыталыстыба дьаһалтатын салайааччы Афанасий Владимиров:
— Билигин ыччат толкуйдаабыта олоххо киирэрин ситиһэр туһугар айыахтаах-тутуохтаах. Онуоха бу форум төһүү күүс, улахан көмө буолар. “СахаСелигер” уонна “Хотугу Синергия” форумнар ыытыллан, дьоһуннаах уларыйыы, сайдыы барбытын бэлиэтиибин. Сылтан сыл кыттааччылар олоҕу көрүүлэрэ уларыйар, таһымнара үрдүүр. Форум биэс хайысхатын кыттыылаахтара Саха сирин сайыннарарга тирэх буолалларыгар эрэнэбин.
СӨ Ыччат дьыалаларыгар уонна социальнай коммуникацияларга миниистир Степан Саргыдаев:
— “Хотугу Синергия” 2014 сылтан эдэр урбаанньыттары, айар ыччаты, фермердэри, тыа сирин ыччатын өйөөн, араас хайысхаларга үлэлээн кэллэ. Кыттааччылары кытта ыҥырыылаах ыалдьыттар, Саха Өрөспүүбүлүкэтин салалтата, бастыҥ инженердэр, бэлитиичэскэй диэйэтэллэр, биллэр айар-тутар дьон, волонтерскай хамсааһыны тэрийээччилэр, урбаанньыттар бииргэ үлэлээтилэр, ситиһиилэрин туһунан кэпсээтилэр. Манна ыччат бэйэ-бэйэтин кытта кэпсэтэр, уопут атастаһар, сыалын ситиһэр. Тустаах эспиэрдэри, былаас уорганнарын бэрэстэбиитэллэрин, урбаанньыттары, наука үлэһиттэрин, о.д.а. кытта кэпсэтэн, билиилэрэ-көрүүлэрэ элбиирэ, кэҥиирэ саарбаҕа суох. Ыччакка туохтан да куттаммакка иннигит диэки хардыылаан иһиҥ диэн баҕа санаабын тиэрдэбин. Бу форумтан үтүө, сырдык эрэ санаалар хаалыахтарын баҕарабын.
Ирина Бурцева, «Профlife» хайысханы салайааччы:
— Идэлээх сойуус ыччата форумҥа үһүс төгүлүн кыттар. Бу иннинэ “Үлэһит ыччат” диэн ааттаах хайысхалаах этибит. Быйыл үлэбит ыырын кэҥэтэн, оробуочай үлэҕэ туһаайан, идэтийиигэ олоҕуран, «Профlife» диэн буоллубут. Хайысхабыт кыттааччылара 50, 60 тыһыынча солкуобай суумалаах биэс грант иһин бырайыактарын көммүскээтилэр. Ордук көхтөөх кыттааччыларбытын Пятигорскайга буолуохтаах «Стратегический резерв-2019» диэн форумҥа ыытабыт. Өрөспүүбүлүкэ идэлээх сойууһун федерацията күүскэ өйөөн, кыттааччыларбытын тэҥ таҥаһынан, эбии аһынан хааччыйдыбыт.
Сыыппаралар
5 хайысха
181 кыттааччы
1 000 0000 солк. суумалаах грант
Айтана Аммосова, «Саха сирэ» хаһыат, edersaas.ru