Эдэр дьон бэйэ дьыалатын саҕалыырыгар, дьарыктаах буолуутугар “Хотугу Синергия” форум төһүү күүс буолара саарбахтаммат. Бу форум Саха сиригэр быйыл төрдүс төгүлүн ыытыллыаҕа. Манна ыччат бырайыактаах, үлэ барылын илдьэ кэлэн көмүскүүр, араас эйгэҕэ үлэлии-хамныы сылдьар экспертэртэн сүбэ-ама ылар, уопут атастаһар.
Түмүккэ бастыҥ бырайыактаахтар араас суумалаах граннары сүүйэллэр. Грант сүүйэн, бырайыагын олоххо киллэрбит дьон туһунан тиһигин быспакка “Саха сирэ” хаһыакка, edersaas.ru саайтка сырдатабыт. Быйылгы “Хотугу Синергия” ыччат форумугар кыттыан баҕалаахтартан (18-35 саастаах ыччат) сайаапканы атырдьах ыйын 15 күнүгэр диэри туталлар. Быйыл атырдьах ыйын 21-25 күннэригэр Нам улууһун киинигэр ыытыллыаҕа.
Үөрэх былаһаакката биэс хайысхаҕа арахсан үлэлиэҕэ: “Саха сирин лиидэрдэрэ”, “Мин – Инженербин”, “Арктика ыччата”, “Профlife” уонна “Биһиги – доброволецтарбыт”. Кыттааччылары кытта ыҥырыылаах спикердэрэ, Саха Өрөспүүбүлүкэтин салалтата, бастыҥ инженердэр, политическай диэйэтэллэр, биллэр айар-тутар дьон, спортсменнар, волонтерскай хамсааһыны тэрийээччилэр, бастыҥ урбаанньыттар бииргэ үлэлэһиэхтэрэ, ситиһиилэрин туһунан кэпсиэхтэрэ. Мустубут ыччат биэс күн устата хайысхаларынан арахсан, араас тиэмэҕэ лиэксийэлэри истиэхтэрэ, бырайыактарын көмүскүөхтэрэ, билиилэрин хаҥатыахтара, дьыалабыай оонньууларга, чөл олоҕу түстүүр тэрээһиннэргэ кыттыахтара.
Бастыҥ бырайыактаахтар араас суумалаах СӨ бырабыыталыстыбатын граннарын сүүйүөхтэрэ.
Кыттыан баҕалаахтар атырдьах ыйын 15 күнүгэр диэри АИС «Молодежь России» саайтыгар https://myrosmol.ru/event/31921 ссылканан сайаапкаларгытын ыытыҥ.
edersaas.ru