Хотугу өрүстэргэ ыксаллаах балаһыанньа суох

Өлүөнэ өрүскэ муус устуута Эдьигээн уонна Булуҥ улуустарыгар бара турар. Аллараа кирбиитэ Дьаардаан сэлиэнньэтиттэн 80 килэмиэтирдээх сиргэ устар, уу таһыма 1391 см., үөһээ кирбиитэ Эдьигээн сэлиэнньэтиттэн 50 киэлэмиэтирдээх сиргэ баар, уу таһыма 910 см.

Муус 278 килэмиэтир усталаах сиринэн устар. Күһүүр таһынан муус хамсаан эрэр, уу таһыма 1084 см. (муҥутуур таһым – 3150 см). Манна ыам ыйын 28-29 күннэригэр муус устара күүтүллэр. Оттон бэс ыйын саҥатыгар өрүс мууһун муораҕа киллэрэрэ сабаҕаланар.

Халыма өрүскэ муус Орто Халыма улууһун сиригэр-уотугар устар. Аллараа кирбии Колымское сэлиэнньэттэн 5 килэмиэтирдээх сиргэ баар, уу таһыма 904 см. (муҥутуур таһыма – 1010 см.). Үөһээ кирбиитэ Колымское сэлиэнньэттэн 150 киэлэмиэтир тэйиччи баар, уу туһаыма 155 см. Черскэй сэлиэнньэтин аттынан өрүс бэс ыйын саҥатыгар эстиэҕэ.

Зырянка аттынан уу таһыма 536 см. (муҥутуур таһыма – 850 см.). Зырянка аэропордун көтөр балаһатыттан уу түһэн, порт үлэлии турар. Алазея өрүскэ Арҕахтаах сэлиэнньэтин аттынан муус хамсаан эрэр, уу таһыма 437 см. (муҥутуур таһыма – 777 см.). Бу күннэргэ муус устара күүтүллэр.

— Орто Халымаҕа, Колымскайга уонна Черскэйгэ ыксаллаах быһыыны-майгыны сэрэтэр туһуттан 45 киһилээх, 6 устар ааллаах уонна 2 салгын тэллэхтээх ааллаах бөлөх тэрилиннэ. Бу бөлөх иһигэр 16 федеральнай уонна өрөспүүбүлүкэтээҕи быыһааччылар бааллар. Яна, Индигирка өрүстэргэ муус устуута уустуга суох баран иһэр. Уу таһыма муҥутуур бэлиэттэн намыһах, — диэн ЫБММ Саха сиригэр кылаабынай управлениетын начаалынньыга Павел Гарин бэлиэтээтэ.
Индигирка өрүскэ муус Абый улууһугар 200 килэмиэтир сиринэн тэнийэн устар. Белай Гора сэлиэнньэтиттэн 200 килэмиэтирдээх сиргэ аллараа кирбиитигэр уу таһыма 713 см. (муҥутуур таһыма – 1202 см). Үөһээ кирбиитэ Чокуурдаах аттынан баар, уу таһыма 467 см. ;муҥутуур таһыма – 913 см.). Аллайыаха улууһугар бэс ыйын саҥатыгар өрүс эстэрэ күүтүллэр.
Яна өрүскэ Усуйаана улууһугар муус хамсаата. Аллараа кирбиитэ Юбилейная сэлиэнньэттэн 47 килэмиэтирдээх сиргэ баар, уу таһыма 1156 см. (муҥутуур таһыма – 1350 см.). Үөһээ кирбиитэ Юбилейная сэлиэнньэттэн 60 килэмиэтир үөһээ баар. Муус устуутун уһуна 107 килэмиэтир диэн ЫБММ кылаабынай управлениетын пресс-сулууспата иһитиннэрэр.

Ангелина Васильева, “Саха сирэ” хаһыат, edersaas.ru

Хаартыска: sakha.gov.ru