Өбүгэ үгэһин, сиэрин-туомун, спортивнай күрэстэрин кэнчээри ыччакка тиэрдэргэ, иҥэрэргэ Дьокуускайга Яна Викторовна Игнатьева генеральнай дириэктэрдээх А.Е.Кулаковскай аатынан норуоттар доҕордоһууларын дьиэтэ тиһиктээхтик үлэлэһэр. Олортон биирдэстэринэн, олунньу 8 күнүгэр куорат оскуолаларын үөрэнээччилэригэр хотугу норуоттар спортивнай күрэстэрин тэрийэн ыытыылар, национальнай-култуурунай холбоһуктар ааспыт сыллааҕы үлэлэрин түмүктэрин билсиһиннэриилэрэ буолар. Бу туһунан пресс-сулууспаттан иһитиннэрдилэр.
—Саха сиригэр 129 араас бырааттыы норуоттар олороллор. 75 национальнай культурнай түмсүүлэр үлэлииллэр. Сомоҕолоһуу сылын саҕаланыыта аан бастакы көрсүһэр, сэһэргэһэр, санааны үллэстэр, ааспыт сыл түмүктэрин уонна саҥа сыл былааннарын билиһиннэрэр тэрээһин буолбута. Маныаха биһиги үлэбитин сааһылаан, былааннаан, сыллата өссө кэҥэтэргэ, сайыннарарга ылсабыт.
Билэргит курдук, 2019 сыл Арассыйаҕа — тыйаатыр, Саха сиригэр Сомоҕолоһуу сыла саҕаламмытынан, Өксөкүлээх Өлөксөй аатынан норуоттар доҕордоһууларын дьиэтигэр олунньу 8 күнүгэр «Сомоҕолоһуу. Ситиһиилэр. Инники былааннар» диэн нэһилиэнньэҕэ аһаҕас айар отчуот алтыс төгүлүн ыытыллар.
Бу күн сарсыарда 10 чаастан киэһэ хойукка диэри тэрээһин салҕаныа. Норуоттар доҕордоһууларын дьиэтин салаалара, национальнай-култуурунай холбоһуктара ааспыт 2018 сыллааҕы үлэ түмүктэрин, ситиһиилэрин, олохторун култуура эйгэтигэр анаабыт дьоммутун көрдөрөр хаартысканан быыстапка, хотугу норуоттар оонньууларын бэстибээлэ, олоҥхону толорор эдэр дьон кулууптара тэриллибитин сүрэхтэниитэ, «Доҕордоһуу» араас омук квест оонньуута, «Сюрприз» Арассыыйаҕа уһулуччу көрдөрүүлээх, Саха сирин норуодунай үҥкүү кэлэктиибэ аһаҕас уруога былааннанар.
Айар талааннаахтар түмсэн биир сомоҕо буолбуттара аҥаардас бу тэрээһинтэн көрдөххө, тэрилтэ уопсастыба, култуура сайдыытыгар, интернациональнай доҕордуу сыһыан бөҕөргүүрүгэр, норуот уратытын сайыннарыыга туһааннах үлэтин эппиэтинэстээхтик толороро бигэргэнэр, — диэтэ.
Маны сэргэ, 219 №-дээх саалаҕа оскуолалартан хамаанда тэринэн кэлбит спортсменнар «Хотугу оонньуулар тыыннаах эрчимнэрэ» күрэскэ күөн көрсүөхтэрэ. Күрэхтэһиигэ 4-6 кылаас оҕолоруттан тэриллибит хамаандалар спортсменнара наартаны ойууга, маамыктаны быраҕыыга, туйаҕы уонна хаарынан сүүрэргэ атахха кэтиллэр анал тэрили кэтэн баран сырсыахтара, дүлүҥү анньыга, «Дьарҕаа балыгы хаптарыыга», «Ноорига»о.д.а. илин-кэлин түсүһүөхтэрэ диэн эттилэр. Баҕалаахтары, сэҥээрбиттэри 8964-418-67-25, 8984-110-12-36 төлөпүөнүнэн сиһилии билсэргитигэр ыҥыраллар.
