Быйыл төрүт омуктар төрөөбүт тылларын үйэтитии аан дойдутааҕы сылыгар АЛРОСА хампаанньа иһинэн тэриллибит «Анаабыр алмаастара» тэрилтэ сүүрбэ сыллаах үбүлүөйүн көрсө «Хотугу норуоттар остуоруйаларын» түмэр мультимедийнэй диискэни таһаарда. Хомуурунньукка хоту дойду төрүт олохтоохторун тылларынан отучча остуоруйа киирдэ.
edersaas.ru
Сэтинньи 2 күнүгэр мультимедийнэй хомуурунньугу тэрилтэ корпоративнай саайтыгар http://alanab.ykt.ru/frontend/web/skazki/?url=skazki уктулар. Манна киирэн ким баҕалаах норуот уус-уран айымньытын билсиэн сөп.
Аҕыйах ахсааннаах хотугу норуоттар остуоруйаларын киэҥ эйгэҕэ таһаарар бырайыак тыл үөрэхтээх учуонайдар, артыыстар, иллюстратор-худуоһунньуктар, волонтердар көмөлөрүнэн күн сирин көрдө.
Онон эбээн, эбэҥки, долган, дьүкээгир, чукча, саха уонна нуучча тылынан тымныы тыйыс айылҕалаах дойдуга хайдах тыыннаах хааларга норуот уостан уоска биэрэр муудараһын, олоххо үөрэтэр уобарастарын, алыптаах уонна мүччүргэннээх түгэннэрин интэриниэт ситимигэр уктулар.
«Хотугу норуоттар остуоруйаларын» диискэтин оҕо уһуйааннарыгар, үөрэх тэрилтэлэригэр ыытыахтара.
Павел Маринычев, «Анаабыр алмаастара» хампаанньа генеральнай дириэктэрэ:
— Аныгы олох сайдан, дьон үксэ киин сир диэки, куоракка тардыһан, онно тиийэн сахалыы-нууччалыы күннээҕи олоххо кэпсэтэн, аҕыйах ахсааннаах хотугу норуоттар төрөөбүт төрүт тылларын билбэт, аахпат, саҥарбат буолуулара үгүс. Биһиги хампаанньабыт сүүрбэ сыллаах үбүлүөйүн көрсө ити итэҕэһи көннөрөн, үлэлиир сирбитигэр, Арктика оройугар олорор хоту дойду хоһуун дьонун остуоруйаларын хомуурунньугун таһаардыбыт.
Хотугу норуоттар төрүт тылларын, култуураларын үйэтитиигэ, көлүөнэттэн көлүөнэҕэ удьуор утумун салҕаан иһэргэ, ону салгыы сайыннарыыга сэмэй кылааппытын киллэрдибит. Бу бырайыакпытын салҕаан, аны ырыалары, үһүйээннэри, үҥкүүлэри, уопсайынан, норуот уус-уран айымньытын мунньан, электроннай көрүҥҥэ киллэриэхпит.
Бу саҥа бэлиитикэ буолбатах, биһиги тэрилтэбит үтүө үгэстэрин салҕаан, айылҕаҕа сылдьарга уонна олохтоох дьону кытта алтыһарга сиэри тутуһан, инникитин да Арктика төрүт олохтоохторун өйүүр санаалаахпыт.
Марианна ТЫРТЫКОВА, «Саха сирэ» хаһыат, edersaas.ru