Хотугу многоборье бастыҥ спортсменын быһаарыахтара

Ааптар: 
Бөлөххө киир:

Саха сиригэр хотугу многоборьеҕа бастыҥ спортсмены быһаарыахтара.

«Кыһын Саха сириттэн саҕаланар» бэстибээл иитинэн, сэтинньи 27 күнүттэн, хотугу многоборьеҕа күрэхтэһиилэр ыытыллыахтара. Быйыл күрэхтэһиигэ үс төгүл төхтүрүйэн ыстаныы, маамыктаны быраҕыы уонна наартаны нөҥү ойуу киирэллэр.
«Хотугу норуоттар оонньуулара — бу хотугу сир эр дьонун күүстэрин, сымсаларын, тулуурдарын, дьулуурдарын  көрдөрөр. Спорт национальнай көрүҥнэрэ Саха сирин норуоттарын култуураларын быстыспат сорҕотунан буолаллар. Биһиги элбэх национальностаах өрөспүүбүлүкэбит араас спортивнай тэрээһиннэри көҕүлээччи, саҕалааччы быһыытынан, үгэскэ ытыктабылын уонна ону харыстыырын көрдөрөр үтүө холобурунан буолар«, — диэтэ Ил Дархан Айсен Николаев.

Күөн күрэскэ Дьокуускайтан, Нерюнгриттан, Чурапчыттан, Булуҥтан, Өймөкөөнтөн чулуу спортсменнар түмсүөхтэрэ. Спортсменнар бары коронавируһу утары быһыыны ылбыттар.  Күрэхтэһиини Дьокуускай куорат физкултуураҕа уонна успуорка управлениета тэрийэр.

«Мин күрэхтэһиигэ түөртэ кыттыбытым. Манна күүстээх  спортсменнар күөн көрсөллөр, тургутуһаллар. Ити күрэхтэһиилэргэ турунан бэлэмнэммит буоламмын, үрдүк  ситиһиилэрдэммитим. Манныкка киһи майгыта-сигилитэ уларыйар, тулуурдаах буоларга, инники күөҥҥэ киирсэр иһин дьулуһарга үөрэнэр. Күрэхтэһии куоракка саҕаланан баран сайдан, тэнийэн, болҕомтону тардан өрөспүүбүлүкэ күрэхтэһиитигэр кубулуйбутугар, Ил Дархан Айсен Николаевка махтанабын«, — диэн хотугу многоборьеҕа СӨ уонна РФ успуорт маастара, оонньуулар үс төгүллээх чөмпүйүөннэрэ Андрей Шарга санаатын үллэстэр.

Санатар буоллахха, «Кыһын Саха сириттэн саҕаланар» өрөспүүбүлүкэ сүрүн бэстибээлэ быйыл онус үбүлүөйдээх сыла. Далааһыннаах тэрээһин онлайн уонна офлайн киэбинэн ыытыллар. Үгэс курдук «Тепло якутской Зимы» Саха сирин норуоттарын этническэй таҥастарыгар хаартысканан куонкурус, «Серебряная чешуя» уус-уран оҥоһуктар быыстапкалара, «Саха сирин амтана» гастрономическай бэстибээл, хаартан уонна муустан оҥоһуктар күрэстэрэ, «The Snow Queen in Yakutia» арт-шоу, этно-муода бал-маскараада, о.д.а. ыытыллаллар.

Хаартыска «Спорт Якутии» ылылынна

+1
0
+1
0
+1
0
+1
0
+1
0
+1
0
+1
0