2019 сылтан биэнсийэ систиэмэтигэр элбэх уларыйыылар киириэхтээхтэр. Киһи мунаарара үгүс. Ааҕааччыларбытыттан ыйытыылары хомуйдубут.
Ыйытыыларга РФ Биэнсийэ пуондатын Саха сиринээҕи салаатын үлэһиттэрэ — биэнсийэни аныыры, хаттаан ааҕары, төлүүрү тэрийэр отдел начаалынньыга Анастасия Кычкина уонна социальнай төлөбүр отделын начаалынньыгын солбуйааччы Максим Саввин эппиэттииллэр.
Ыйытыы: Владимир Путин аҕыйах ахсааннаах хотугу норуоттар бэрэстэбиитэллэрэ биэнсийэҕэ 5 сыл эрдэ тахсаллар диэн эппитэ. Мин эбээн хааннаахпын эрээри, саха курдукпун. Мин аҕыйах ахсааннаах хотугу норуот бэрэстэбиитэлэ буоларбын хайдах дакаастыахпын сөбүй?
Эппиэт: Аҕыйах ахсааннаах хотугу норуоттар (эбээн, эбэҥки, юкагир, чукча, долган) бэрэстэбиитэлэ буолары төрөөһүн туһунан сибидиэтэлистибэ дакаастыыр. Оннук докумуон суох буоллаҕына – аҕыйах ахсааннаах хотугу норуоттар общиналара, олохтоох бэйэни салайыныы уорганнара биэрэр докумуоннара бигэргэтиэн сөп.
Билиҥҥи кэмҥэ өрөспүүбүлүкэҕэ аҕыйах ахсааннаах хотугу норуоттар бэрэстэбиитэллэриттэн 62 киһи социальнай биэнсийэни ылар. Дьахтар 50, эр киһи 55 сааһын туоллаҕына уонна аҕыйах ахсааннаах хотугу норуоттар олорор сирдэригэр олохсуйан олорор буоллаҕына, биэнсийэҕэ тахсар бырааптаах. Онон олорор сиргиттэн эмиэ тутулуктаах эбит.
Ангелина Васильева, «Саха сирэ» хаһыат, edersaas.ru