Бэлиитикэ Сүрүн

ХОТУГУ ФОРУМ: Саха сирин биэс улууһа аан дойдутааҕы бырайыакка кыттыста

Саха сирин биэс улууһа бу күннэргэ III Хотугу форум кэмигэр “Биир ситимнээх куораттар уонна олохтоох былаас” диэн аан дойдутааҕы холбоһук чилиэннэрэ буоллулар. Хотугу форум Дьокуускай куоракка балаҕан ыйын 27-30 күннэригэр ыытылла турар.

“Биир ситимнээх куораттар уонна олохтоох былаас” диэн холбоһук аан дойду үрдүнэн куораттары, эрэгийиэннээҕи салалтаны, олохтоох бэйэни салайыныы тэриллиилэрин, сэбиэттэрин бииргэ түмэр. Бу холбоһук 2004 сыллаахха тэриллибитэ. Сүрүн сыалынан аан дойду уопутун тарҕатыы, туһааннаах үөрэтэр семинардары ыытыы буолар. Холбоһук Евразиятааҕы отделениетыгар Азербайджан, Армения, Белоруссия, Грузия, Казахстан, Киргизия, Монголия, Таджикистан, Туркменистан, Узбекистан, Украина, Монголия уонна Арассыыйа эрэгийиэннэрэ киирэллэр.

Холбоһук чилиэнэ буолар сибидиэтэлистибэни бу күннэргэ Хотугу форум кэмигэр Өлөөн, Сунтаар, Горнай, Хаҥалас уонна Уус Алдан улуустара туттулар. Холбоһук Евразиятааҕы отделениетын генеральнай сэкирэтээрэ Расих Сагитов бэлиэтииринэн, хас биирдии улуус аан дойду таһымыгар тахсан бэйэтин көрдөрүөн, биллэриэн сөп. “Бу биэс улуус аан дойдутааҕы холбоһук чилиэннэринэн буоллулар. Бу холбоһукка киирии тугу биэрэрий? Бастатан туран, улуустар аан дойдуга туох буола турарын билэр-көрөр, ону таһынан онно кыттар кыахтаналлар. Иккиһинэн, аан дойду таһымыгар тахсан бэйэлэрин көрдөрөн, улуустарын, эрэгийиэннэрин, дойдуларын сайдыытыгар төһүү буолуохтарын сөп”, – диэн бэлиэтиир Расих Сагитов.

Аграфена КУЗМИНА,

Мария ВАСИЛЬЕВА (СИА) хаартыскаҕа түһэриитэ.

0
0