Маны аах Экэниэмикэ

Хотугу эргимтэҕэ күн уонна дизель күүһүнэн үлэлиир биэс уот комплекса тутуллуоҕа

РФ Арктикатааҕы түөлбэтин резиденэ “Энергетиканы кэлимсэ быһаарыы” (“Комплексные энергетические решения”)  хампаанньа өрөспүүбүлүкэ хотугу эргимтэтигэр биэс аныгы гибриднэй уот комплексын тутуоҕа, диэн “Якутия24” Уһук Илин уонна Арктика сайдыытын корпорациятын пресс-сулууспатыгар сигэнэн иһитиннэрдэ.

Автоматизированнай гибриднэй уот комплекстара күн уонна дизель  уот ыстаансыйатыттан тураллар уонна эргэрбит дизельнэй генератордары солбуйуохтара. Бу бырайыакка 470 мөл солкуобай көрүлүннэ.

Бастакы эбийиэги тутуу Дьааҥы оройуонун Табалаах нэһилиэгэр саҕаланна. Онон Табалаахха уонна Улахан Күөлгэ үлэ ыытыллар. Бу хампаанньа салайааччыта Константин Пилипенко этэринэн, тутууну атырдьах ыйын ортотугар бүтэриэхтэрэ.

“Онтон орун оннугар буоларын курдук көрүөхпүт-истиэхпит, ол кэннэ балаҕан ыйыгар эбийиэк үлэҕэ киириэҕэ. Уопсайа дизель уонна күн көмөлөрүнэн үлэлиир биэс гибриднэй уот ыстаансыйатын үлэҕэ киллэриэхпит. Уопсай кыамталара 7,3 МВт. Онон биһиги энергокомплекстарбыт Арассыыйа тэйиччи сытар оройуоннарыгар бөдөҥ ыстаансыйаларынан буолуохтара”, — диэтэ кини.

Хампаанньа салайааччыта этэринэн, бырайыагы олоххо киллэрии дизельнэй оттугу туһаныы кээмэйин аччатыаҕа. Онон сэлиэнньэлэр уот саҥардыллар источниктарыгар көһүөхтэрэ, бу түмүгэр салгыҥҥа буортулаах эттик быраҕыллыыта аччыаҕа.

Сахагов саайтан

Бэлэмнээтэ Женни Стрюкова

Хаартыска: тустаах саайтан

 

0
0