Үөһээ Муунаҕа олунньу 17 күнүгэр «Заполярнай» айылҕа баайдаах сиргэ ювелирнай хаачыстыбалаах, 98,8 караат ыйааһыннаах алмаас көһүннэ. Күндү таас октаэдрическай быһыылаах, араҕастыйан көстөр дьэҥкир дьүһүннээх.
edersaas.ru
«Айылҕа сүдү баайын хостуур сир былырыын алтынньыга үлэтин саҕалаабыта, ол кэмтэн ыла бу иккис улахан алмааһы булбуттара Өлөөн дойдутун саппааһа сүҥкэн баайын туоһулуур. Хас биирдии кимберлитовай туруупка аайы 50 карааттан ыарахан ыйааһыннаах алмаас көстүбэт. 100 караатка тиийэр бөдөҥ таас бэрт сэдэх көстүү. Үрдүк хаачыстыбалаах тааһы үөрэтэн баран, «АЛРОСА Бирилийээннэригэр» кырыылата биэриэхпит», — диэн этэр Евгений Агуреев, «АЛРОСА» алмааһы батарар салаатын дириэктэрэ, бырабылыанньа чилиэнэ.
Санатан эттэххэ, ювелирнай хаачыстыбалаах 51,49 караат ыйааһыннаах бастакы улахан алмааһы 2018 сыл алтынньы 31 күнүгэр булбуттара.
Үөһээ Мууна Сахабыт сирин арҕаа өттүгэр, Өлөөн улууһугар Удачнай куораттан 170 килэмиэтирдээх сиргэ баар. Билиҥҥи туругунунан, «Заполярнай», «Деймос», «Новинка», «Комсомольская-Магнитная» түөрт кимберлитовай туруупка чинчийиллэн, үлэлии турар. «АЛРОСА» хампаанньа бу саамай улахан инвестиционнай бырайыага. Сир баайдаах дойдуну аан бастаан бэлэмнииргэ 16 миллиард солкуобай үбү бараабыттара, оттон 2042 сылга диэри үлэлэтэргэ 60 миллиард солкуобайы угуохтара. Үөһээ Мууна сылга 1,8 мөлүйүөн караат алмааһы биэрэр кыахтаах. Өлөөн алмааһа быһа холоон 2042 сүүрбэччэ сылга диэри тиийиэн сөп.
Марианна Тыртыкова, «Саха сирэ», edersaas.ru