Бүгүн «Якутия» технопааркаҕа дьоҕус бизнес эйгэтигэр бэйэлэригэр кыахтарын холонон көрүөн баҕалаах дьоҥҥо «Хотугу акселератор» диэн идэни үрдэтиигэ туһуламмыт үөрэх саҕаланна.
Елена ПОТОЦКАЯ, «Саха сирэ» хаһыат, edersaas.ru
«Акселератор» диэн өйдөбүл туох суолталааҕый? «Түргэтэтии» (латыын тылынан «accelero») диэн тыл ис хоһооно бизнес эйгэтигэр туох сыһыаннааҕый?
— Бу бэйэ дьыалатын саҥа саҕалааччы кылгас кэм иһигэр уопуттаах бизнесмен көмөтүнэн бэйэ оҥорон таһаарар табаарын батарыыга, өйөбүлүнэн туһанарга инвестицияны тардарга үөрэниитэ. Эдэр урбаанньыттарга түргэн хайысхалаах үөрэҕи биэриини технопаарка иһинэн үлэлиир «Бизнес-оскуола» баар эрдэҕиттэн толкуйдаабыппыт. Паарка резиденнэрин бэлэмниирбитигэр бизнес эйгэтин ымпыгар-чымпыгар үөрэтэри таһынан, омук сиригэр стажировкаҕа ыытарбыт. Оччолорго бизнес-оскуола дириэктэрэ Василий Охлопковы кытта маннык ис хоһоонноох түргэн үөрэхтэргэ киэҥ эйгэни хабар туһунан баҕа санаабытын испитигэр иитиэхтии сылдьыбыппыт. Ол баҕа санаабытын мин — технопаарка салайааччытынан, Василий Охлопков — Ил Дархан иһинэн үлэлиир инновация менеджменин Үрдүкү оскуолатын проректорынан буолбутун кэннэ олоххо киллэрэр кыахтанныбыт, — диэн сонун тэрээһини билиһин нэрэр «Якутия» технопаарка салайааччыта Анатолий Семенов.
«Хотугу акслератор» үөрэх инновационнай хайысхалаах дьоҕус бизнеһи үлэлэтэн барарыгар далаһа буолар көрүҥ. Кылгас кэм иһигэр уопуттаах бизнесменнэр бэйэ бордууксуйатын хайдах батарарга, инвестицияны бэйэҕэ тардыы ньымаларыгар үөрэтиэхтэрэ. Бастакы сэминээргэ бизнес-бырайыагы табыгастаахтык оҥоруу уонна ол ону олоххо киллэрии боппуруостарын ырытыахтара. Манна киин куорат ааттаах-суоллаах урбаанньыттара маастар-кылаастары ыытыахтара.
Бастакы сэминээр буолан, үөрэх босхо ыытыллар. Лиэксийэлэри технопаарка салайааччыта Анатолий Семенов, «Инвестиция сайдыытын агенствота» диэн кэскиллээх бырайыактары тарҕатар салаа сүрүннүүр маркетолога Туйаара Максимова, «I-accelerator» тэрилтэ генеральнай дириэктэрэ Виталий Виноградов, экономика Үрдүкү оскуолатын преподавателэ Наталья Поротникова ааҕыахтара.
Бизнес эйгэтигэр бастакы хардыыны оҥорооччулар номнуо үөрэх кэмигэр инвестицияны бэйэлэригэр тардан барыахтара. Ол туоһутунан кинилэр бэйэлэрин бырайыактарын технопааркаҕа эбэтэр «Кангалассы» түргэнник сайдар территорияҕа олоххо киллэриэхтэрэ. Онон бу үөрэххэ үөрэнээччилэргэ кэнэҕэс бизнес эйгэтигэр улахан хамсааһын тахсарын ааһан, бастыҥнар Соҕуруу Кэриэйэҕэ стажировкаҕа барыахтара.
Елена ПОТОЦКАЯ, «Саха сирэ» хаһыат, edersaas.ru