Бүгүн видеосибээһинэн Ил Дархан Айсен Николаев биисинэс-уопсастыбаннай тэрилтэлэр бэрэстэбиитэллэрин кытта көрсүһүүтүн кэмигэр улуустартан дьоҕус уонна орто биисинэс бэрэстэбиитэллэрэ кыттыыны ыллылар.
edersaas.ru
Урбаанньыттар улуустарга Ил Дархан ыйааҕа миэстэтигэр хайдах туолан иһэрин билиһиннэрдилэр. Ол курдук, Томпо улууһун урбаанньыта Ирина Копылова уонна Дьааҥы улууһуттан «Арктика» ХЭТ генеральнай дириэктэрэ Владимир Чириков урбаан бары салааларыгар нолуокка чэпчэтии олохтоноругар, ону тэҥэ сыстыганнаах дьаҥы бохсууга муҥутуур бэлэм эрэсиимин кэмигэр үлэлиир тэрилтэлэр ахсааннарын эбэргэ этии киллэрдилэр.
Ил Дархан бары урбаанньыттар санааларын истэн баран, бырабыыталыстыбаҕа урбаанньыттары өйүүр миэрэлэргэ эбии киирэр этиилэри чопчулуурга сорудахтаата.
— Миэхэ сүрүн сорук — өрөспүүбүлүкэ олохтоохторун доруобуйатын чөл туруга айгыраабата. Онон быһах биитинэн салгыы хаамарбытыгар тиийэбит. Өскө урбаанньыттары туох да хааччаҕа суох үлэлэттэххэ – бүрүүкээн турар усулуобуйаҕа тыһыынчанан дьон олоҕор куттал суоһуурун умнар сатаммат. Бу күннэргэ Алдаҥҥа буолбут түбэлтэ — ол туоһута. Куорат ырыынага үлэлиирин көҥүллээһин түмүгэр коронавируһунан ыалдьыбыт киһи онно сылдьан, дьон доруобуйатын айгыратар кутталы үөскэттэ, — диэн Ил Дархан тоһоҕолоон бэлиэтээтэ.
Мунньах бүтэһигэр Айсен Николаев бырабыыталыстыбаҕа тыа сирин кэккэ улуустарыгар үгүс хааччахтаммыт миэрэлэри аҕыйатар боппуруоһу ырытан көрөрүгэр, оттон Арктическай улуустарга сорох хааччахтааһыны көтүрэргэ соруйда. Ил Дархан маны тэҥэ билигин «толору изоляция» эрэсиимигэр олорор муниципальнай тэриллиилэргэ сорох хааччаҕы чэпчэтэр миэрэлэри үөрэтэн көрүү туһунан видеосибээһинэн ыытыллыбыт мунньахха иһитиннэрдэ.
Елена ПОТОЦКАЯ, «Саха сирэ» хаһыат, edersaas.ru
Хаартыска — Андрей Сорокин.