Ааспыт бээтинсэҕэ, кулун тутар 10 күнүгэр, Саха сирэ хоту улуустарга таһаҕаһы тиэрдиини тупсарар туһунан этиилэрин Арктиканы сайыннарыы боппуруостарынан дьарыктанар судаарыстыбаннай хамыыһыйа көрүүтүгэр киллэрдэ. Бу туһунан Новости РИА иһитиннэрэр.
Роман Попов, “Саха сирэ” хаһыат, https://edersaas.ru
Онно муоранан сырыыны чөлүгэр түһэрии, өрүстэри дириҥэтэр суудуналары тутуу боппуруоһа туруорулунна. Былырыын баара-суоҕа 12 земснаряд үлэлээбит эбит буоллаҕына, 80-90-с сылларга ити сыалга 39 тиийэ тиэхиньикэ туһаныллыбыта ыйылынна. Онон Саха сирэ Транспорт министиэристибэтигэр Росморечфлоту кытта кыттыһан “Арассыыйа транспорка тиһигэ (2010-2020 сыллар)” тус сыаллаах бырагырааманан Арктика өрүстэригэр үлэлиэхтээх модун тиэхиньикэни туталларыгар итиэннэ тимирбит суудуналары хостуулларыгар этиилэрдээх. Билигин Арктика өрүстэригэр 90-тан тахса суудуна тимирэн сытара биллэр.
Ону сэргэ өрөспүүбүлүкэ Өлүөнэ, Дьааҥы, Индигир өрүстэргэ уу таһымын кэтиир постары, Хатангаттан Певеккэ диэри күнү-дьылы кэтээн көрөр ыстаансыйалары чөлүгэр түһэриини туруорсар.
Саха сирин бу этиилэрин Арктика кэмитиэтэ болҕомтоҕо ылан, олоххо киллэрдэҕинэ, хоту улуустарга таһаҕаһы тиэрдии усулуобуйата биллэ тупсуоҕа диэн буолар.
Роман Попов, “Саха сирэ” хаһыат, https://edersaas.ru