Ил Дархан Айсен Николаев «Хоту тент» хампаанньа генеральнай дириэктэрин Афанасий Махатыровы кытта көрүстэ. Саха хампаанньата соторутааҕыта итиини тутар нанокомпозитнай матырыйаалынан оҥорор оҥоһуктарын «Аармыйа-2022» пуорумҥа көрдөрөн биһирэммитэ. Бу хас да хос итиини тутар тэрили байыаннай тиэхиньикэҕэ туттарга былаанныыллар.
Атырдьах ыйыгар хампаанньа үлэлэрэ Нуучча географическай уопсастыбатын V бэстибээлигэр уонна «Аармыйа 2022» байыаннай-тиэхиньиичэскэй быыстапкаҕа турбуттара. Тэрээһиннэргэ кыттыбыт ыалдьыттар хампаанньа үлэлэрин олус интэриэһиргээбиттэрэ. РФ Оборонаҕа Министиэристибэтэ ураты болҕомтотун уурбута. Пуорумҥа «Хоту тент» хампаанньа «ЭРА» байыаннай инновационнай технополиһы уонна «Бурлак» экстремальнай тиэхиньикэни оҥорон таһаарар «Уралмашвагонзавод» тэрилтэни кытта бииргэ үлэлээһиҥҥэ сөбүлэҥ түһэрсибитэ. «Хоту тент» хампаанньа оҥорон таһаарар оҥоһугун бастыҥ хаачыстыбата — хомуллара түргэнэ, илдьэ сылдьарга табыгастааҕа. Бу туһунан бэйэтин телеграм-ханаалыгар Айсен Николаев бэлиэтээбитэ уонна үлэлэригэр ситиһиини баҕарбыта.
Елена ПОТОЦКАЯ, «Саха сирэ» хаһыат.