Хоту олоробут диэбэттэр — арбууһугар тиийэ үүннэрэллэр

Ааптар: 
Бөлөххө киир:

Соторутааҕыта бассаап бөлөҕөр ыраах Дьааҥы улууһуттан хас даҕаны хаартыска тигинээн кэллэ. Саха сирин киинигэр сорохтор оҕурсуларын саҥа амсайан эрэр эбит буоллахтарына, Дьааҥы улууһун Бала сэлиэнньэтин сис ыала Слепцовтар оҕурсуну сиэн ырааппыттар. Ылдьыыҥҥа – атырдьах ыйын 2 күнүгэр арбуһу кытта амсайар эбиттэр.

edersaas.ru

Чахчытын билээри, “Эдэр саас” саайт үлэһиттэрэ ыал аҕатын, Бала оскуолатын саха тылын уонна литэрэтиирэтин учуутала Петр Николаевич Слепцовы кытта төлөпүөнүнэн сибээстэһэ сырыттыбыт, иһитиннэрии оруннааҕын бигэргэттэ.

Манна сибиэһэй оҕуруот аһа букатын кэлбэт. Мотуордаах дьон улуус кииниттэн – Баатаҕайтан ыарахан сыанаҕа атыылаһан кэлэллэр.

Оҕуруот аһын 1995 сылтан үүннэрэбит. Бастаан кыра тэпилииссэлээх этибит, оҕурсу, помидор олордорбут. Бастакы сылларга букатын үүммэтэҕэ, биэс сылтан бэттэх таптыбыт. 2017 сыллаахха тэпилииссэбин кэҥэппитим, оһохтоох, онто суох биһиги тымныы сирбитигэр табыллыбат, түүнүн биллэ тымныйар.

Үүнээйибитин бэс ыйын 5 күнүттэн тэпилииссэҕэ таһаарабыт. Эрдэ таһаарар сэрэхтээх. Сорох поликарбонат тэпилииссэлээх дьон арыый эрдэлииллэр быһыылаах. Манна биир ыал тэпилииссэтэ дьиэтиттэн ититиилээх буолан, муус устарга таһаарабыт диир. Кыһынын уутун сүөкээн арааран кэбиһэллэр.

Быйыл 60-ча хаппыыста, 20 оҕурсу, 10-ча помидор, минньигэс биэрэс, сүбүөкүлэ, моркуоп уонна хортуоска, укуруоп олортубут. Былырыын сүбүөкүлэ бэрт бөдөҥ этэ, атырдьах ыйыттан номнуо сиэн барбыппыт, быйыл даҕаны оннук буолуох чинчилээх.  Билигин да былырыыҥҥы хаһаастан салаат оҥостон сииллэр.

Арбуһу хаһыс да сылын сөбүлээн үүннэрэбит. Икки сыллааҕыта 8 устууканы ылбыппыт, алтата олох үчүгэй этэ. Саамай улахаммыт 5,5 киилэҕэ тиийэ улааппыта. Ону Ылдьыыҥҥа – атырдьах ыйын 2 күнүгэр номнуо сиэбиппит. Быйыл арыый кыралар. Хортуоскабытын эмиэ атырдьах ыйын ортотуттан “уоран” сиэбитинэн барабыт.

Оҕуруоппут аһын кэнсиэрбэлиибит, ордубутун кырбаан ларьга тоҥоробут. Кыһын бэйэбит оҕуруоппут аһын сиибит, — диэн кэпсиир.

Үөрүүлээҕэ диэн сэлиэнньэлэригэр уу сайыҥҥы турбатын тардыбыттар. Бэҕэһээ бэрэбиэркэлээн көрүү быһыытынан, бастакытын холбоон уу ыыппыттар. Бүгүн үөрүүлээх быһыыга-майгыга аспыттар. Онон олохтоохтор махталлара, үөрүүлэрэ муҥура суох, оҕуруот аһын олордорго бэрт усулуобуйа тэрилиннэ дэһэллэр.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0