Хоту эргиэн-логистика кииннэрэ аһылланнар, сорох аска-үөлгэ сыана 20-25 бырыһыан намтаабыт
Эргиэн-логистика кииннэрэ Абый уонна Усуйаана оройуоннарыгар аһылланнар, сыана 2019 сылы кытта тэҥнээтэххэ, сорох аска-үөлгэ 20-25 бырыһыан намтаабыт.
Манна оҕуруот аһын уурар сирдэр, тоҥорор (морозильнай) камералар, сылаас ыскылааттар, атыылыыр сирдэр бааллар. 2024 сылга диэри маннык кииннэр бары арктическай оройуоннарга баар буолаллара былааннанар. Бу туһунан СИА «Якутопторг» хампаанньа дириэктэрин солбуйааччы Сайдам Степанов иһитиннэрбит.
«2019 сылы кытта тэҥнээтэххэ, сыана ортотунан 20-25 % намтаабыт. Холобур, бурдук — 29%, саахар — 21% , ириис куруппата — 28 %, туус — 40%, мас арыыта — 15%», — диэбит Сайдам Степанов.
Быйыл Арктикаҕа аан бастаан Узбекистантан быһаччы оҕуруот аһын уонна фруктаны аҕалыы саҕаланна. «Арбуз, виноград, дьаабылыка, сухофрукталар аҕалыллыбыттара. Дьокуускайга 1980 сыллаахха үлэҕэ киллэриллиэҕиттэн өрөмүөннэммэтэх, эрэгийиэҥҥэ улахан, 5 тыһ. тиийэ туонна оҕуруот аһын уурар улахан сир саҥардылынна диэн кини кэпсээтэ.
Эргиэн-логистика кииннэрин тутуу, хааччыйыы саҥа систиэмэтигэр көһүү иитинэн ыытыллар. Бырагыраама Ил Дархан Айсен Николаев ыйааҕар олоҕуран «Якутопторг» (маҕаһыыннарын уонна ыскылааттарын кытта) уонна «Туймаада-Агроснаб» (флотун уонна автобаазатын кытта) тэрилтэлэри холбуур туһунан быһаарыы ылыллыбытын кэнниттэн, 2019 сылтан саҕаламмыта. Икки тэрилтэ үлэлэрэ хатылаһара уонна арктическай оройуоннары хааччыйыынан дьарыктаналлара.
Арктикаҕа ыскылааттар олус эргэрбиттэринэн эргиэн-логистика кииннэрин тутуу быһаарыллыбыта. Манна даҕатан эттэххэ, эргэ ыскылааттар 1960-1970-с сылларга тутуллубуттар.
+1
+1
+1
+1
+1
+1
+1