Хотугу байҕал кытылыгар сытар Анаабыр улууһун Үрүҥ Хайатын нэһилиэгэр улахан сэргэхсийии таҕыста.
edersaas.ru, «Саха сирэ» хаһыат
Үрүҥ Хайа баһылыга Канат Алькенов салайыытынан, нэһилиэккэ тупсарыы үлэтэ күүскэ ыытыллар. Үрүҥ Хайа култууратын үлэһиттэрэ бу хамсааһыны өйөөн, нэһилиэктэрин олохтоохторугар босхо фонтан тутан биэрдилэр. Санатан эттэххэ, Култуура дьиэтин быйыл Иван Семенов баһылыктаах улуус дьаһалтата туттаран, олохтоохтор үөрүүлэрэ үрдээбитэ.
Хотугу сиргэ сэдэхтик көстөр фонтаны оҥоруу сүрүн үлэтигэр, Култуура киинин дириэктэрэ Сергей Сыроватскай салалтатынан, Максим Винокуров, Дмитрий Спиридонов, Алекс Пименов, оҕолор Айысхан уонна Алдан Сыроватскайдар илиилэрин сылааһын уурдулар.
Кырааска, тупсарыы үлэтигэр Култуура дьиэтин кэрэ аҥардаара, оһуорун-мандарын түһэриигэ уран тарбахтаах эдэр ыаллар Алена уонна Евгений Матросовтар ылсаннар, сонун көстүүнү ситэрэн-хоторон биэрдилэр.
Эһиил фонтаны өссө тупсаран биэрэн, оҕо аймах, улахан дьон, ыалдьыттар сынньанан ааһар сирдэригэр кубулутар былааннаахтар. Онуоха тас өттүн мраморынан үтүгүннэриэхтэрэ, ис өттүн бассейн анал пленкатынан сабыахтара уонна, үп-харчы ситэ көрүлүннэҕинэ, улахан носуоһу сакаастыахтара. Биллэн турар, аттыгар оҕо былаһааккатын оҥоруохтарын баҕараллар.
Фонтан тутуллуутугар матырыйаалынан көмөлөспүт нэһилиэк баһылыга Канат Ускенбаевичка уонна Анаабыр пуондатын салайааччыта Густав Семеновичка барҕа махталларын тиэрдэллэр. Култуура үлэһиттэрэ Сомоҕолоһуу сылыгар, бу курдук уопсай дьыала тула түмсэн, бары бииргэ үлэлииргэ-хамсыырга ыҥыраллар.
Надежда ЕГОРОВА, “Саха сирэ” хаһыат, edersaas.ru