Бу күннэргэ киин куоракка икки күннээх хоту дойду норуоттарын ыччаттарын лиидэрдэрин оскуолата буолан ааста.
Үөрэх бастакы күнүгэр Лиидэр оскуолатын кыттааччылара Дьокуускай куораттааҕы ыччаттар түмсүүлэрин кытта көрүстүлэр. Ол кэнниттэн сонун сүүрээннэри билиһиннэрии түһүмэҕэ буолла. Онно «Кындыкан» түмсүү туһунан Маргарита Попова кэпсээтэ. Бырайыак соруга — өрөспүүбүлүкэ хотугу норуоттарын сомоҕолооһун уонна кинилэр кыһалҕаларыгар болҕомтону ууруу. Бырайыакка кыттааччылар ырыа, хоһоон айаллар, уруһуйдууллар, хаартыскаҕа түһэрэллэр, видеоҕа киинэ усталлар. Онон ыччаттар мультипликационнай киинэ устар, кинигэ таһаарар былааннаахтар.
Ыччат Хотугу форумун үлэтин туһунан Сардаана Сыромятникова кэпсээтэ. Кини Арктика бары ыччатын сомоҕолуур былааннаах үлэ хайысхатын, торумун билиһиннэриитэ үгүс киһи болҕомтотун тарта. Былырыын балаҕан ыйыгар куйаар ситиминэн ыытыллыбыт Хотугу форумҥа 300-тэн тахса ыччат кыттыыны ылбыта. СӨ Ыччат Ассамблеятын салайааччыта Нурудин Нурудинов ыччаттар бэйэлэрин тылларын сайыннаралларыгар санаатын тиэртэ уонна онуоха Норуоттар ассамблеялара көмөлөһөргө, өйүүргэ бэлэмин бэлиэтээтэ. Ити курдук ыччаттар волонтердар үлэлэригэр сыһыаннаах үлэ уопутун кытта билистилэр, араатар ускуустубатыгар үөрэннилэр, лиидэрдэр салайар кыахтарын уһугуннарар уйулҕа үөрэҕин аастылар.
Елена ПОТОЦКАЯ Саха сирэ хаһыат, edersaas.ru
Хаартыска: Марьяна Попова