РФ Үлэҕэ министиэристибэтэ Хоту дойду биэнсийэлээхтэрэ сынньана баралларыгар, айан төлөбүрүн толуйуу бэрээдэгин судургутутарга этии киллэрдэ.
РФ Үлэҕэ министиэристибэтэ, Уһук хоту дойду биэнсийэлээхтэрэ сынньалаҥҥа сылдьалларыгар уонна тимир суолунан айаннарыгар сыанатын туһунан, Биэнсийэ пуондатыгар бигэргэтэр докумуоннары биэрэллэрин ирдээбэт туһунан сокуон барылын бэлэмнээтэ. Билигин тустаах пуонда бырайыас туһунан сибидиэнньэни Арассыыйа тимир суолларыттан бэйэтэ ылыаҕа диэн ТАСС үлэ уонна социальнай сайдыы миниистирэ Андрей Пудов этиитигэр сигэнэр.
“Хоту эрэгийиэннэргэ олорор биэнсийэлээхтэргэ сынньана барар миэстэлэригэр бырайыас төлөбүрүн ороскуотун толуйууну ылыыны судургутутар туһунан этиллэр. Элбэх ыспыраапканы хомуйуу тохтуохтаах, ол иһигэр айан сыалын туһунан”, — диэтэ Андрей Пудов.
Үлэ министиэристибэтигэр чопчулаабыттарынан, бүгүн Уһук Хоту дойдуга уонна итиннэ тэҥнэммит миэстэлэргэ олорор саастарынан страховой биэнсийэни уонна инбэлиитинэн ылааччылар, икки сылга биирдэ, Арассыыйа сиригэр-уотугар сынньана барбыт уонна төннүбүт айаннарын суолун ороскуотун толуйууну ылар кыахтаахтар. “Маннык толуйууну ылаары биэнсийэлээхтэр ПФР сирдээҕи-уоттааҕы салаатыгар тиийэллэр. Толуйуу айан докумуонун (билиэт), ону тэҥэ ороскуоттары толуйуу көрүҥүнэн оҥоһуллуоҕа”, — диэн пресс-сулууспаҕа бэлиэтээтилэр.
Билигин туһаныллар сокуонунан билиэттэри ылар туһугар биэнсийэлээх санаторийтан, профилакторийтан, сынньалаҥ дьиэлэриттэн, туристар баазаларыттан бигэргэтэр докумуону биэриэхтээх. Иккис түгэҥҥэ, өскөтүн киһи билиэти бэйэтэ атыыластаҕына, оттон бу айанныыр сиригэр ыарахан сыаналаах тырааныспар, холобур, тимир суолга – түргэн уонна фирменнэй буойастар баар буоллахтарына, ороскуоттары толуйууну Арассыыйа тимир суолларыттан ылбыт ыспыраапкаҕа олоҕуран оҥоһуллар.
“Үлэ министиэристибэтэ киллэрэр көннөрүүлэргэр олоҕуран, сынньаммыт сиргин бигэргэтэр докумуону бэриллибэт, оттон айан сыанатын туһунан сибидиэнньэни Арассыыйа Биэнсийэҕэ пуондата тимир суол тэрилтэтиттэн электроннай көрүҥүнэн бэйэтэ ирдэһиэ”, — диэн Үлэ министиэристибэтигэр быһаардылар.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын саайтыттан
Бэлэмнээтэ Женни СТРЮКОВА, “Саха сирэ” хаһыат
Хаартыска: тустаах саайтан