Бу күннэргэ Амма улууһугар «Болугур» ТХПК саҥа тутулла турар хотоно сууллан, үс киһи эчэйиини ылбытын туһунан суруйан турабыт.
«Болугур» ТХПК Аммаҕа эрэ буолбакка, өрөспүүбүлүкэҕэ биллэр биир улахан хаһаайыстыба. Бүгүҥҥү туругунан, 676 сүөһүнү уонна 782 сылгыны кыстатан тураллар. Бу күһүн 120 сүөһү турар хотонун тутуутун саҕалаабыттара (бэдэрээтчит ИП «Ксенофонтов С.П.»).
Алтынньы 20 күнүгэр кэпэрэтиип үлэһиттэрэ субуотунньукка тахсыбыттар. Үлэҕэ куттал суох буолуутугар үлэһиттэргэ эрдэ инструктаж ыытыллыбыт. Уопсайа 13 киһи үлэлээбит. Үлэлии сырыттахтарына, тыраахтар халтарыйан, хотон тулааһынын атаҕын таарыйан, тутулла турар эбийиэк сууллубут. Ол түмүгэр үс киһи эчэйиини ылбыт.
Билигин тутууну чөлүгэр түһэрии үлэлэрэ ыытыллаллар. Былаан быһыытынан, хотон сэтинньи 10 күнүгэр үлэҕэ киллэриллиэхтээх.
Анивера Акимова, «Саха сирэ» хаһыат, edersaas.ru