Бу күннэргэ Хаҥалас улууһун Хоточчу нэһилиэгэр түөлбэлэр күрэхтэһиилэрэ буолан ааста.
Култуура үлэһиттэрэ түөлбэлэр спартакиадаларын 10-с сылын тэрийэллэр. Бу туһунан уопсастыбаннай кэрэспэдьиэн Лира Яндреева билиһиннэрэр:
— Сыл аайы ыытыллар спартакиаданы олохтоохтор олус сөбүлүүбүт, анаан кэтэһэбит. Дуобат, саахымат, хабылык, хаамыска, остуол тенниһэ, волейбол, көрдөөх эстафета — бу барыта киһини сэргэхситэр тэрээһиннэр.
Күрэс түмүгүнэн «Бойдуһа» түөлбэ олохтоохторо кыайыылааҕынан таҕыстылар. Кинилэр үһүс төгүлүн көһө сылдьар кубок хаһаайыннарынан буоллулар.
Дьону биир санааҕа түмэр, сомоҕолоһуу тыынын сайыннарар, чөл олоххо угуйар тэрээһин быйыл да олус табылынна. Сааһыттан тутулуга суох кыттааччы ахсаана сыл аайы эбиллэ турарыттан тэрийээччилэр сүргэбит көтөҕүллэр.
Чэбдигирии сылыгар бу бастакы тэрээһиммит. Мантан кынаттанан, мантан саас араас тэрээһин элбэх буолуоҕа.
Елена ПОТОЦКАЯ, «Саха сирэ» хаһыат, edersaas.ru
Хаартыска: Лира Яндреева тиксэриитэ