Мин, Михайлов Арылхан, Сунтаардааҕы бастакы нүөмэрдээх орто оскуола иккис кылааһыгар үөрэнэбин.
edersaas.ru
Учууталым Светлана Юрьевна Яковлева Кыайыы үбүлүөйдээх сылынан сэриигэ сылдьыбыт дьоҥҥут тустарынан суруйан аҕалыҥ диэн сорудах биэрбитэ. Онно мин эбээбин кытары хос—хос эһээм Куприян Васильевич Яковлев туһунан суруйдубут.
Хос-хос эһээм 1905 с. Сунтаар улууһун Маар Күөл нэһилиэгин Бордуолааҕар төрөөбүт. Маар Күөлгэ бастаан «Төбүрүөн» уонна «Бордуолаах» диэн артыаллар тэриллибиттэр, кэлин холбоһон «Правда» холкуос буолбуттар. Хос-хос эһээм холкуос биир туруу үлэһитэ эбит. Ол да иһин киниэхэ уопсай аһы-үөлү, малы-салы дьаһайыыны итэҕэйбиттэр, сэрии иннинэ пиэрмэ сэбиэдиссэйинэн уонна бырабылыанньа чилиэнинэн талбыттар.
Куприян Васильевич сэриигэ сылдьан, хос—хос эбээбэр балачча суруйара үһү. Ол суруктарыгар ахтан курдаттыы тартара сылдьар алта кырачааннарын кыһанан-мүһэнэн туран иитэ-харайа сатыырга сүбэлиир эбит. Биир суругар кылгас болдьохтоох кууруска үөрэнэн, танковай чааска сулууспалыыр буолбутун туһунан суруйбут. Дьэ, ол кэнниттэн сурук да кэлбэтэх, бэйэтэ да эргиллибэтэх. Биирдэ, 1943 сыллаахха бэс ыйыгар, командование сорудаҕын хорсуннук толорбутун иһин «Бойобуой үтүөлэрин иһин» мэтээлинэн наҕараадаламмытын туһунан хамандыыра суруйбут. Кэлин Куприян Васильевич Яковлев 1943 сыл от ыйын 15 күнүгэр, Орловскай уобалас Холмищи сэлиэнньэтиттэн хоту, 600 миэтэрэлээх сиргэ көмүллүбүтүн туһунан 49 гвардейскай строевой полк биллэриитэ кэлбитэ диэн эбээм кэпсээбитэ. Мин хос—хос эһээм курдук үчүгэй үлэһит, хорсун санаалаах киһи буола улаатыам уонна төрөөбүт—үөскээбит дойдубун ханнык баҕарар түгэҥҥэ көмүскүөм.
Арылхан Михайлов, Сунтаар. «Саха сирэ» хаһыат, edersaas.ru.