Мин хос эһээм Александр Степанович Павлов 1924 сыллаахха Горнай оройуонун Бэрдьигэстээх нэһилиэгэр “Өлөн” диэн учаастакка төрөөбүт.
edersaas.ru
Аҕа дойду Улуу сэриитигэр 1942 сыллаахха баара суоҕа 18 сааһыгар ыҥырыллыбыт. Эһээм Бастакы Украинскай фронт стрелковай дивизия полкатыгар станковай пулемет хамандыыра эбит. Львов куораты, Карпат хайаларыгар Чехословакияны босхолооһун уоттаах сэриитигэр сылдьыбыт. 1944 сыллаахха балаҕан ыйын 12 күнүгэр ыараханнык бааһыран, госпиталга киирбит. Младшай сержант Александр Павлов Аҕа дойду сэриитигэр хосуннук сэриилэһэн, «За отвагу” уонна “За боевые заслуги” диэн мэтээллэринэн наҕараадаламмыт. Госпиталтан төрөөбүт дойдутугар эргиллэн, хос эбээбин Прасковья Константиновна Данилованы кытта ыал буолан, биир уол уонна икки кыыс оҕоломмуттар.
Хос эһээм Александр Степанович сэриигэ сылдьыбыт кэмнэрин мээнэ кэпсии сылдьыбат эрээри, сорох түгэннэри, оҕолоро: “Аҕаа, сэриигэ сылдьыбыккын кэпсээ даа…” – диэн көрдөстөхтөрүнэ, ахтан ылар эбит. Мин эһээм Александр Александрович Павлов аҕатын кэпсээниттэн өйдөөн хаалбыт биир түгэнин бу курдук кэпсиир:
“Биир күн саллааттар атаакаҕа туруммуттар. Буулдьа, снаряд быыһынан кимэн киирэн, фашистар окуопаларыгар биирдэ баар буолбуттар. Дьэ, онно саҕаламмыт илиинэн киирсии кытаанаҕа. Мин аҕам окуопаҕа ыстанан түһээтин кытта, биир ньиэмэс саллаата аптамаатынан ыппыта, ботуруона, дьолго, бүтэн хаалбыт. Кинжалын сулбу тардан ылан, сыыһа-халты охсуолаабыт. Аҕам фашиһы илиититтэн харбаан ылбыт уонна ыһыктыбакка ыга тутан баран, өлөр-тиллэр икки ардынан улахан тиниктэһии буолбут. Ол сылдьан, фашист аҕабын аллараа сыҥааҕын кулгааҕын таһыттан сэҥийэтигэр тиийэ хайа охсубут. Аҕам дьэ өлөр буоллум дии санаабыт. Ол кэмҥэ биир саллаат сүүрэн кэлэн фашиһы кэнниттэн ыстыыгынан дьөлө аспыт. Ыстыыга курдат тахсан, аҕам иһин таарыйбыт. Аҕам ол бааһын көрдөрөр этэ. Өссө да элбэҕи кэпсиир этэ да, өйдөөн хаалбатахпын. Барытын ол саҕана суруйан испит киһи, үчүгэй өйдөбүнньүк буолуо эбит…”.
Мин хос эһээм Александр Степанович Павлов Аҕа дойду сэриитигэр хорсуннук кытта сэриилэһэн, Улуу Кыайыыны уһансыбыта. Биһиги, сиэннэрэ, төһө да эһэбитин көрбөтөхпүн иһин, кинини дьиҥнээх дьоруой курдук саныыбыт уонна ытыктыыбыт.
Мин бу күннэргэ эһээм туһунан матырыйаал хомуйаары, ыраах Тымныы Полюһуттан – Өймөкөөнтөн эһээбинээн Горнайдааҕы аймахтарбытын кытта сибээстэһэн, икки улуус Павловтара – Александр Степанович Павлов хос сиэннэрэ – хос эһээбит туһунан бэрт элбэҕи биллибит. Онон мин хос эһээм Горнайы уонна Өймөкөөнү сибээстиир ытык киһибитинэн буолар. Биһиги, хос сиэннэр, хос эһээлэрбит олохторун дьоһуннаахтык салгыахпыт диэн эрэннэрэбин.
«Саха сирэ» хаһыат, edersaas.ru анаан Данил КРИВОШАПКИН,
Өймөкөөн улууһун Г.А. Кривошапкин аатынан
Төрүт орто оскуолатын 5 кылааһын үөрэнээччитэ.