Өлүөхүмэҕэ ньиэрбэ ыарыһахтар интэринээттэригэр хоруона хамсыгын утары күүстээх үлэ тэриллэр.
Бу туһунан СӨ Үлэ уонна социальнай сайдыы министиэристибэтин пресс-сулууспата иһитиннэрэр. Өлүөхүмэҕэ ньиэрбэ ыарыһахтары эмтиир интэринээккэ, олохсуйбут бэрээдэккэ уонна ирдэбилгэ олоҕуран, хоруона хамсыгын тарҕаппат, бохсор туһугар бары кыһамньы ууруллар, үлэ тиһиктээхтик ыытыллар. ОРВИ сибикилээхтэри изоляторга киллэрэллэр диэн иһитиннэрэллэр.
Алта киһи инфекционнай стационартан үтүөрэн тахсыбыт. Онтон атын, ыарытыйбыттар, улуустааҕы киин балыыһа көрүүтүнэн-истиитинэн тастан эмтэнэллэр. Социальнай тэрилтэҕэ бары санитарнай-эпидемиологическай ирдэбиллэр тутуһуллаллар, дьиэни-уоту дезинфекциялыыллар, сууйуу-сотуу салҕанар, эмп-томп уонна дьаҥтан харыстанар сириэстибэлэр эбии ылыллыбыттар. Манна тымныйбакка этэҥҥэ сылдьар дьон сынньаналларыгар анаан туспа сир бэлэмнэниллибит. Оттон муус устар саҥатыттан, интэринээт сабыылаах эрэсииминэн тохтоло суох үлэлиир. Мэдиссиинэ өртүттэн уонна социальнай өҥөлөр ирдэбилгэ сөп түбэһэн оҥоһуллаллар диэн министиэристибэ иһитиннэрэр.
Бу интэринээккэ үлэлиир быраастар COVID -19 бохсорго, дьаҥы тарҕаппат туһугар үлэни тэрийэргэ үөрэммиттэр. Мэдиссиинэ көмөтүн күүһүрдэргэ, оройуоннааҕы социальнай сулууспа инфекционист-бырааһын эбии анаабыттар. СӨ Үлэ уонна социальнай сайдыы министиэристибэтэ доруобуйа харыстабылын тэрилтэлэрин уонна Роспотребнадзор бэрэстэбиитэллэрин кытары, быһыыны-майгыны билэн, тутан уонна суһал быһаарыныыны кэмигэр ылан иһэр туһуттан, тиһиктээхтик кэтээн көрүү үлэтин тэрийбит.
+1
+1
+1
+1
+1
+1
+1