Арассыыйа Бырабыыталыстыбата быһаарыытынан хортуоппуйу уонна атын оҕуруот аһын үүннэрээччилэргэ көмө элбииһи. Ол курдук саҥа «Оҕуруот аһын уонна хортуоппуйу үүннэриини сайыннарыы» диэн федеральнай бырайыакка дьоҕус уонна орто тэрилтэлэри сэргэ, бэйэ дьарыктаах дьон (самозанятайдар) уонна кэтэх хаһаайыстыбалар эмиэ кыттыыны ылыахтара. Бу туһунан уураахха Мишустин илии баттаабыт.
Субсидия сир үлэтигэр, оҕуруот аһын үүннэриигэ, ол иһигэр таска уонна теплицаҕа саҥа элитнай суортары таһаарарга эмиэ туһуланыаҕа.
Үбү трансферт быһыытынан тиксэрэллэригэр, Крымҥа, Севастопольга уонна Уһук Илиҥҥэ, киэҥ үүннэрии былааны баарын учуоттан, быдан элбэҕи тыырыахтара.
Оҕуруот аһын харайар дьиэни-уоту (овощехранилищени) тутааччылар ороскуоттарын түөрт гыммыт үһүн толуйуохтарын сөп. Ханнык бырайыагы өйүүрү-өйөөбөтү Тыа хаһаайыстыбатын министиэристибэтигэр анал хамыыһыйа быһаарыаҕа.
Бу «Оҕуруот аһын уонна хортуоппуйу үүннэриини сайыннарыы» диэн федеральнай бырайыак эһиил тохсунньу 1 күнүттэн саҕаланыаҕа. Оттон оҕуруот аһын харайары тутуу уонна саҥардыы хайысхата 2024 с. үлэлиэҕэ.
«Саха сирэ» хаһыат