Хорсун пенсионерка халабырдьыттары тутарга көмөлөстө

Ааптар: 
Бөлөххө киир:

Дьокуускай куоракка 54 саастаах дьахтар халабырдьыттартан куттаммакка, кинилэри кэннилэриттэн эккирэтэн, киһиэхэ да көмөлөспүт, полицейскайдарга да туттарбыт. Ол хайдах буолбутуй?

edersaas.ru


СӨ ИДьМ-тын пресс-сулууспата иһитиннэрбитинэн, бу дьыл от ыйын 12 күнүгэр эбиэт кэмигэр бу дьахтар дьүөгэтигэр ыалдьыттаан баран, дьиэлээн испит. Каландаришвили уулуссатынан оргууй аҕайдык хааман истэҕинэ, кинини уолаттар ситэн ааспыттар.

Сонно тута киһи көмөҕө ыҥырар хаһыытын истибит уонна доҕолоҥ эр киһи куотан эрэр уолаттары кэннилэриттэн эккирэтэ сатаан иһэрин өйдөөн көрбүт. Дьахтар тохтуу түспүт. Куотааччылар эмиэ тохтообуттар уонна эр киһиэхэ туһаайан, өссө сааныылаах буолбуттар.

Эмсэҕэлээбит киһи дьахтар аттыгар кэлэн, ити уолаттартан биирдэстэрэ кини харчылаах кумааһынньыгын илиититтэн туура былдьаан баран куоппутун эппит. Ити кэмҥэ урдустар дьиэлэр быыстарынан киирэн, үрүө-тараа сүүрбүттэр. Эр киһи инбэлиит да буоллар, «баҕар, ситээйэбин» диэбиттии, кэннилэриттэн батыаккалаабыт.

Бу киһини аһынан, дьахтар эмиэ халабырдьыттары кэннилэриттэн эккирэппит. Ол сүүрэн иһэн, «02» нүөмэргэ эрийбит уонна куотан эрэр уолаттары төлөпүөнүгэр хаартыскаҕа түһэрбит, инбэлиит киһини тохтото сатаабыт.

Бу хорсун пенсионерка көмөтүнэн, Росгвардия полицейскайдара бу халааһыны ити күн, «сылааһына» арыйбыттар, уорбаланааччылар тутуллубуттар. Кумааһынньыгы былдьааччы — Ньурбаттан төрүттээх, урут хаста да сууттана сылдьыбыт 29 саастаах урдус.

Бу чахчынан «халааһын» ыстатыйанан холуобунай дьыала тэриллибит.

Оттон киһиэхэ көмөлөстөрбүн диэн бэйэтин харыстанарын умнан, халабырдьыттары кэннилэриттэн сырсыбыт, кинилэри тутарга көмөлөспүт саха хорсун дьахтарыгар ис дьыала миниистирэ, полиция генерал-майора Владимир Прокопенко офицердар ытыстарын тыаһын доҕуһуолугар «Махтал суругу» кытта кыһыл көмүс хары чаһытын туттарбыт.

Пенсионерка урут алын кылаастар учууталларынан үлэлээбит эбит.

Биһиги корр., «Саха сирэ» хаһыат, edersaas.ru

Хаартыска: интэриниэттэн

+1
0
+1
0
+1
0
+1
0
+1
0
+1
0
+1
0