Биһиги кыра кылааска үөрэнэрбитигэр нууччалыы ааҕар учуобунньукка кэпсээн баара, ааптара кимин өйдөөбөппүн.
Дэриэбинэҕэ эмээхсин баһаар кэмигэр умайа турар дьиэттэн сүүнэ улахан сундуугу көтөҕөн таһаарбытын туһунан суруллубут. Кэлин ол дьааһыгы эр дьон хаһыа да буолан нэһиилэ сыҕарыппыттар. Уолуйбут эмээхсиҥҥэ эмискэ дьикти күүс киирэн баар суох баайын быыһаабыт. Учууталбыт быһаарбыта:
— Ыксаллаах түгэҥҥэ сорох дьон бэйэлэрэ да өйдөөбөттөрүнэн хорсун быһыыны оҥорор кыахтаналлар.
Кэлин мин учууталлыырбар ити кэпсээн кинигэттэн быраҕыллыбыт этэ. Наадата суоҕунан аахтахтара. Ол эрэн олоххо итиннэ майгынныыр түбэлтэ тахсарын туһунан кэпсииллэр, суруйаллар. Хорсун быһыыны оҥорбут, иэдээҥҥэ түбэспиттэри өлөртөн быыһаабыт дьон үксүгэр этэллэр:
—Тугу да уһуну- киэҥи толкуйдуу барбатаҕым, көмөлөһүөхтээхпин, быыһыахтаахпын эрэ диэн санаа киирбитэ, — дииллэр. Өссө кинилэртэн интервью ыллахтарына хайаан да эбэн этэллэр:
— Мин оннубар ким баҕар итинник быһыыланыа этэ!
Суох, оннук буолбатах. Киһи барыта хорсун быһыыны оҥорор кыаҕа суох. Бэйэлэрин харыстаммакка дьону быыһааччылар туспалар, атыттар. Үксүгэр кинилэр оннук кыахтаахтарын атын дьон эмиэ сэрэйбэттэр.
Кылааһым оҕолоро иккискэ дуу, үһүскэ дуу үөрэнэр кэмнэригэр маннык түбэлтэ буолбута. Оскуолабыт икки этээстээх мас дьиэ, биһиги кабинеппыт үөһэ этээскэ этэ. Түннүктэр мас араамалаахтара — пластик олоххо киирэ илигэ. Түгэх диэки түннүк кыра чааһа аһыллар-сабыллар форточка этэ.
Кылааска уолаттарбыт кыргыттардааҕар икки төгүл элбэхтэрэ. Сорох сытыы кыргыттар уолаттардыын бииргэ мэниктииллэрэ, тэҥҥэ аахсаллара, сороҕор “киирсэн” да ылаллара. Оттон Лариса оннук буолбатах, сэмэй кыыс этэ. Үөрэҕэр үчүгэй эрээри бытаан, хаһан да мээнэ өрө биэрбэт, толкуйдаан баран саҥарар.
Кыһын курдук өйдүүбүн. Форточка тэлэччи аһаҕас турара. Арай уруок кэмигэр ол форточканан кылааспытыгар чыычаах көтөн киирдэ! Бэйэтэ да “ханна- туохха түбэстим” диэн уолуйдаҕа, тахсар баҕалаах кынаттарын сараппытынан өстүөкүлэҕэ охсулла-охсулла тэйэн, көтөн сарыкыныы сырытта. Оҕолор соһуйан, таалан, көрөн олордулар. Мин харахпар барабыай отой бөдөҥ көтөр курдук көһүннэ. Кырдьыганан эттэххэ тугу гыныахпын билбэтим, “кылаастан куотарбыт дуу” диэн санаа киирдэ. Кими эмэ ыҥыран аҕалан биһигини “быыһыа” эбиттэрэ буолуо.
Эмискэ били бытаан, сэмэй Ларисабыт ыстанан турда. Көрүөх бэтэрээ өттүгэр ойон тиийэн түннүк таһынааҕы олоппоско, онтон паартаҕа үктэннэ, чыычааҕы хам тутан ылла да аһаҕас форточканан таһырдьа элээрдэн кэбистэ! Аҕыс-тоҕус саастаах кыыс оҕо! Кып-кыра ытыһынан! Өстүөкүлэҕэ охсуллан сарыкыныы сылдьар тыыннаах чыычааҕы! Биир-биэс тыла суох! Ити аҕыйах сөкүүндэ иһигэр Лариса барыбытын сөхтөрөн турардаах. Соһуччу түгэҥҥэ эмискэ быһаарыы ылынан түргэнник хамсанар киһи кини эбит.
Айталыына Хоһуунаба