Хорообут оскуолатын выпускниктара үөрэммит кыһаларыгар ыалдьыттаатылар

Дмитрий Таас аатынан Хорообут орто оскуолатын 1968 сыллааҕы выпускниктара быйыл кыһаны бүтэрбиттэрэ 50 сылын бэлиэтииллэр. Өртөн кэтэһиллибит көрсүһүү олунньу 22 күнүгэр ыытылынна, выпускниктар сүүрбэччэ буолан үөрэммит оскуолаларыгар ыалдьыттаатылар, учууталларын, үөрэнээччилэри, пед—кэлэктииби кытта көрүстүлэр.

Бу күн РФ үтүөлээх экономиһа, СӨ норуот хаһаайыстыбатыгар туйгуна Владимир Птицын көҕүлээһининэн «Алгыстаах аартыгынан» кинигэ сүрэхтэниитэ буолла. Кинигэ тас ойуутун Үлэ Албан аата уордьан кавалера, худуоһунньук идэлээх Александра Габышева уруһуйдаабыт.

Көрсүһүү үөрүүлээх тэрээһинин Елена Санникова уонна Александра Сергина иилээн-саҕалаан ыыттылар. Эдэр учууталлар уруоктары ыытан сүргэлэрин көтөхтүлэр. Номнуо 70 саастарыгар чугаһаабыт дьон үөрэ-көтө үөрэммит сылларын ахтан-санаан аастылар. Педагогическай үлэ бэтэрээннэрэ Төхтүртэн Нина Колосова, Полина Скрыбыкина, Хорообуттан Егор, Мария Птицыннар ыалдьыттаатылар.

Кинилэри оройуон салалтатыттан Павел Сазонов, улуустааҕы үөрэх управлениетын начаалынньыга Ирина Черкашина, үөрэҕирии үлэһиттэрин идэлээх сойуустарын бэрэссэдээтэлэ Степан Андреев, киин бибилэтиэкэ дириэктэрэ Елизавета Корнилова, оскуола дириэктэрэ Алексей Оконешников эҕэрдэлээтилэр, эдэр көлүөнэҕэ холобурга сылдьалларын, кинилэр бачыымнара салҕанан иһэригэр баҕа санааларын тиэртилэр, бэлиэ наҕадаадалары туттартаатылар.

Оскуолаҕа сэмэй бэлэхтэрин ‒ көмпүүтэр тиэхиньикэтин бэлэхтээтилэр, быйылгы оскуоланы бүтэрээччигэ кэс тылларын анаатылар. Үөрэнээччилэр ырыаларын-үҥкүүлэрин, хоһооннорун бэлэхтээтилэр.

Улуустааҕы киин бибилэтиэкэ кэлэктиибэ 50 сыллааҕыта үөрэммит үөрэнээччилэр ситиһиилэрин, үлэлэрин-хамнастарын билиһиннэрэр кинигэ быыстапкатын туруордулар.

Бу күн Александра Габышева аатынан ИЗО-ҕа уонна Павел Скрябин аатынан черчениеҕа үөрэнээччилэр улуустааҕы олимпиадалара ыытылынна.

Уруһуйга 11 оскуолаттан 43 үөрэнээччи кытынна. 4‒7 кылаастарга кыайыылаахтарынан Павловскайтан Настя Петрова, Балыктаахтан Маша Неустроева, Тумултан Алина Эверстова, Карина Терентьева буоллулар. 4 кылаастарга Нелли Гоголева, Ф.Г.Охлопков аатынан Майа оскуолатыттан Дайаана Тобонова, Хаптаҕайтан Маша Атласова, 5 кылаастарга Хорообуттан Аина Жиркова, Тумултан Юля Белолюбская, Баатараттан Аида Баишева, 6 кылаастарга Хорообуттан Аделина Жиркова, Маттаттан Нина Халдеева, Төхтүртэн Наташа Максимова, 7 кылаастарга Тыыллыматтан Катя Осипова, Ф.Г.Охлопков аатынан Майа оскуолатыттан Айна Борисова, В.П.Ларионов аатынан оскуолаттан Майя Бережнева бастыҥнарынан ааттаннылар.

Черчениеҕэ 9 оскуолаттан 33 үөрэнээччи кытынна. Саҥа үөрэтээччилэргэ Төхтүртэн Стас Григорьев, Андрей Атласов, В.П.Ларионов аатынан Майа оскуолатыттан Милена Максимова, Сайаана Бурцева, Хорообуттан Тимир Пинигин, Павловскайтан Наташа Илларионова, иккис сылларын үөрэтээччилэргэ Павловскайтан Андрей Николаев, Хорообуттан Алквиад Босиков, Павел Скрябин, Алеша Винокуров, Баатараттан Руфина Афанасьева, Мэлдьэхситтэн Кирилл Алексеев, үһүс сылларын үөрэтэр оҕолорго Павловскайтан Дося Иванова, Хорообуттан Василий Саввин, В.П.Ларионов аатынан Майа оскуолатыттан Роберт Баишев, Яна Васильева, Мэлдьэхситтэн Евгения Романова, Айаал Кривогорницын бириистээх миэстэлэри ыллылар.

Оскуола саалатыгар 1968 с. выпускниктар — норуот маастардара Христина Бурнашева, Александра Габышева, Альбина Неустроева, архитектор Федор Шишигин, Хорообут нэһилиэгиттэн маастардар Наталья Босикова, Светлана Громова, Татьяна Тихонова, Павел Скрябин, Наталья Босикова үөрэнээччилэрин быыстапкалара дьон-сэргэ болҕомтотун тарта. Кэрэни кэрэхсээччилэргэ маастар-кылаастар тэрилиннилэр.

Марфа ПТИЦЫНА, edersaas.ru  сайтка анаан.