Мэҥэ Хаҥалас улууһугар Хорообут сэлиэнньэтигэр быйыл амбулатория тутуллуо.
«Саха» уонна «Якутия 24» телеханаалларыгар, «Тэтим» араадьыйаҕа ытыллыбыт үрдүкү салалта отчуотугар, СӨ Бырабыыталыстыбатын Бэрэссэдээтэлин солбуйааччы Ольга Балабкина Мэҥэ Хаҥалас улууһугар Хорообукка амбулатория тутулларын туһунан иһитиннэрдэ. Эбийиэк доруобуйа харыстабылын бастакы сүһүөх звенотун саҥатытан оҥоруу бырагырааматын иитинэн тутуллар.
—Нэһилиэккэ тутуу ханан ыытыллара быһаарылынна. Онон бу сыл бүтүүтүгэр врачебнай амбулатория аһылларыгар эрэллээхпин, — диэтэ кини. Салгыы Ольга Балабкина 2023 сылга бу улууска Майаҕа дьахтар оҕолонор уонна оҕолор сытар отделениелардаах, 45 миэстэлээх балыыһа комплексын тутуу саҕаланыаҕын туһунан эттэ. 2024 сылга Аллараа Бэстээххэ амбулатория тутуллара былааннанарын иһитиннэрдэ.
Өрөспүүбүлүкэҕэ доруобуйа харыстабылын бастакы сүһүөх звенотун саҥатытыы бырагырааматын иитинэн, 2025 сылга диэри 14 балыыһа уонна поликлиника, 31 модульнай биэссэр-акушер пууна уонна амбулатория тутуллара былааннанар. Маны сэргэ, доруобуйа харыстабылын 55 эбийиэгэ өрөмүөннэниэхтээх.
Хаартыскаҕа Мария Васильева (СИА) түһэриитэ
+1
+1
+1
+1
+1
+1
+1