Уус Алдан улууһугар, Хороҕо, бүгүн дьон-сэргэ уратытык сэргэхсийдэ, үөрдэ-көттө. Ол сэрии бэтэрээнигэр Петр Васильевич Бурцевка, Улуу Кыайыы 75 сылынан, дьиэтигэр киин хочуолтан ититии тиһигэ тардылынна.
edersaas.ru
Бу үөрүүлээх сонуну биһиэхэ С.Г.Крылов аатынан нэһилиэк модельнай бибилэтиэкэтин сэбиэдиссэйэ Ксения Кириллина иһитиннэрдэ:
—Ытык киһибит, нэһилиэкпитигэр соҕотох сэрии бэтэрээнэ, 93 сааһыгар сылдьар Перт Васильевич саамай баҕарар баҕата туолбутуттан, дьиэтигэр ититии тиһигэ киирбититтэн бүтүн нэһилиэк дьоно наһаа үөрдүбүт, эҕэрдэбитин тиэртибит. Үөрүүлээх быһыыга-майгыга кини дьиэтигэр бэтэрээн олорорун көрдөрөр анал бэлиэ иилилиннэ.
Нэһилиэк баһылыга Алексей Ушницкай үлэни-хамнаһы үтүө суобастаахтык, кыһамньылаахтык толорбут ОДьКХ салайааччытыгар Петр Копыриҥҥа уонна үлэһиттэригэр махтанан туран бэлэхтэри туттартаабыт.
Ырыа ылламмыт, хоһоон ааҕыллыбыт. Саха ыалыгар үөрүү кэлбитин бэлиэтигэр уонна оҕустаах хоролор диэн кинилэргэ олохсуйбут, уостан-уоска бэриллибит былыргы номоҕунан, бэтэрээн уола Афанасий Бурцев аҕатын уонна тыыл бэтэрээнин Мария Заболоцкаяны көлүллүбүт оҕуска олордон дьиэ таһыгар күүлэйдэппит, үөрүүлэрин үксэппит.
Онон Кыайыы 75 долгутуулаах сылын көрсө, ытык кырдьаҕаска бэртээхэй уонна үйэлээх бэлэх оҥоһуллубут.
Сардаана Баснаева, «Саха сирэ» хаһыат, edersaas.ru
Хаартыскаҕа Ксения Кириллина түһэриилэрэ