Сунтаарга Хордоҕой сэлиэнньэтигэр спортивнай-чэбдигирдэр комплекс тутуллан үлэҕэ киирдэ.
Бу тыа сирин кэлимник сайыннарыы бырагырааматынан ыытылынна. Федеральнайтан уонна өрөспүүбүлүкэттэн үбүлэннэ, уопсай суумата 53 мөл.солк. диэн СӨ Тыа хаһаайыстыбатын министиэристибэтин пресс-сулууспата суруйар.
—-Тыа сирдэригэр, нэһилиэктэргэ социальнай эбийиэктэри тутуу — өрөспүүбүлүкэ улуустарын, нэһилиэктэрин социальнай-экэнэмиичэскэй сайдыыларын көрдөрөр. Бу бырагыраама тыа сирдэригэр аныгы үйэ ирдэбилигэр толору эппиэттиир социальнай эбийиэктэри, дьон олорор дьиэтин-уотун тутан киллэрэргэ, күөх төлөнүнэн хааччыйарга, сири-уоту, уопсастыбаннай эйгэни тупсаран оҥорорго, уулуссаларга уоту-күөһү киллэрэн сырдатарга кыаҕы биэрэр«, — диэн этэр СӨ Тыа хаһаайыстыбатын миниистирэ Александр Атласов.
Хордоҕой нэһилиэгин баһылыга Сергей Барамыгин бу саҥа дьиэҕэ волейболга, көҥүл тустууга, чэпчэки атлетикаҕа күрэхтэһиилэр ыытыллыахтарын, ким баҕалаах манна кэлэн дьарыктаныаҕын бэлиэтээн этэр. Спортивнай-чэбдигирдэр комплекска волейболга САССР успуордун маастара, самбоҕа ССРС успуордун маастара, самбоҕа уонна дзюдоҕа өрөспүүбүлүкэ уон төгүллээх чөмпүйүөнэ Александр Моякунов аата иҥэрилиннэ. Үөрүүлээх күн волейболга өрөспүүбүлүкэтээҕи турнир XIII төгүлүн ыытылынна. Күрэхтэһиигэ улуустартан уопсайа тоҕус хамаанда күн көрүстэ.
Быйыл Сунтаар улууһугар Күндэйэҕэ 50 миэстэлээх уһуйаан, Сунтаарга уулуссаны уотунан-күөһүнэн сандаардыы уонна сөтүөлүүр бассейнаах успуорт комплекса тутуллан үлэҕэ киирэллэрин күүтэллэр. Маны сэргэ, Сунтаарга улуустааҕы киин балыыһаҕа, Хордоҕой нэһилиэгин амбулаториятыгар, «Партизан» култуура киинигэр биэс көлөнү ылары былаанныыллар.
Хаартыскалар Сунтаар улууһун дьаһалтатын пресс-сулууспатын тиксэриилэрэ
+1
+1
+1
+1
+1
+1
+1