Кулун тутар 22 күнүгэр “Хаарыан хампа” бэстибээлгэ “Режиссер бастыҥ үлэтэ” номинацияҕа түһэриллибит «Хопто» (“Чайка”) испэктээги көрдүбүт.
edersaas.ru
А.Пушкин аатынан Нуучча драматическай тыйаатырыгар Антон Чехов “Хопто” испэктээгин көрөөрү үгүс киһи муһунна.
Испэктээк саҕаланыытыгар «Хаарыан хампа» бэстибээл дириэктэрэ Андрей Борисов, СӨ үтүөлээх артыыһа Айаал Аммосов уонна Нуучча тыйаатырын дириэктэрэ Александр Лобанов бэстибээл туһунан кылгастык билиһиннэрдилэр.
«Хопто» пьеса Антон Чехов биир саамай уһулуччу күүстээх айымньыта буолар. Бастыҥ режиссер номинацияҕа түһэриллибит Елена Корнилова-Мягкая ону сөрү сөпкө тайанан, ааптар тылын тириэрдэн, испэктээк олус үчүгэйдик туруоруллубут. Испэктээк тас көстүүтүгэр сценографист Михаил Егоров бэркэ үлэлээбит. Биир сүрүн оруолу көстүүм оонньуур, ону Лена Гоголева таба тайаммыт, кырдьык даҕаны, көстүүмнэрэ көрөөччү биһирэбилин ылаллар, харахха быраҕыллаллар уонна уобараһы арыйаллар.
Испэктээк туһунан эттэххэ, олох сатирическай көстүүтэ тыктарыллар: ыар дьылҕа, алдьархай, уус тыллаах толкуй, саҥата суох эрэй – бу барыта кимиэхэ да өйдөммөт, барыларыгар тиксэр күннээҕи олох кытаанах үгэргээһинэ буолар. Испэктээги көрө олорон бэл, тыйаатырга олороргун умнаҕын уонна бу кэпсээтиигэ кыттаҕын. Киһи көрө олорон, испэктээк иһигэр киирэн хаалар, дьоруойдар санаарҕыылларын бэйэҕэр иҥэрэҕин. Ол курдук көрөөччүнү күүстээх иэйиигэ ылларар, толкуйдатар. Бу айымньыга хопто – олох символа, кинини сыыһа тутуннахха, түргэнник өлүккэ кубулуйар, ол курдук айааччы атын форманы эккирэтэн тыыннах ускуустубаны өлөрөр. Манна ааптар атын эйгэни эккирэтэн, бэйэҕин аллараа түһэримэ диэн сэрэтэр. Уонна олох-дьаһах сүрүн боппуруостарын туруорар. «Олох уопсай өйдөбүлэ, киһи иэйиитин бары синтеһэ». Бу испэктээк кэнниттэн сүрэҕэ ытырыктаппатах киһи суох буолуохтаах: ким эрэ толкуйга түһэр, ким эрэ бэйэтин олоҕун кытары тэҥниир, ким эрэ харах уулаах тахсар. Бу барыта — испэктээк ситиһиитэ.
Саалаҕа тобус-толору мустубут көрөөччүлэр туран эрэ ытыстарын тыаһын харыстаабакка таһыннылар.
Ольга СТЕПАНОВА, “Саха сирэ”, edersaas.ru сайтка анаан