Ил Дархан Айсен Николаев, от ыйын 4 күнүгэр, өрөспүүбүлүкэҕэ коронавирус балаһыанньатын иһитиннэрэригэр, уопсайынан, хонтуруолу күүһүрдүү уонна ирдэбили тутуһуу наадатын эттэ.
Бастатан туран, сыстыганнаах дьаҥтан үтүөрээччи элбээн эрэрин да иһин, санитарнай ирдэбили тутуһар булгуччулааҕын бэлиэтээтэ. Маныаха от ыйын 2 күнүттэн хааччахтыыр сорох эрэсиимнэр сымнатыллыбыттарын ыйда. Итиэннэ Дьокуускайга дьаҥнааччы ахсаана кэнники күннэргэ эбиллибитин этэн туран, куорат дьаһалтата хонтуруолу өссө күүһүртэҕинэ бу сыстыганнаах дьаҥы намтатар, бохсор кыах баар буолуоҕун бэлиэтээтэ.
Салгыы бүтэһик хонукка алта оройуоҥҥа дьон дьаҥнаабытыгар тохтоото. Кини Дьокуускайтан тиийээччилэри кытта ити сибээстээҕин эттэ.
—Билигин тыа сиригэр төһө оҕо сынньана барарын көрөбүт. Онно биллэринэн, аҥаардас кэнники нэдиэлэҕэ тыһыынчаттан тахса оҕо улуустарга барара бэлиэтэннэ. Оттон маннык сынньана тиийбит оҕо уопсай ахсаана 8,5 тыһыынча кэриҥэ. Маныаха профилактическай үлэ ыытылларын түмүгэр, уопсайа 56 оҕо дьаҥҥа сыстыбыта быһаарыллыбыта. Бу оҕолор сорохторо эмтэнэн үтүөрбүттэрэ, сорохторо билигин эмтэнэллэр, — диэтэ.
Уопсайынан, дьаҥы тарҕаппат инниттэн төрөппүттэр да, аймахтар да болҕомтолоох буолалларыгар, ирдэбили булгуччу тутуһалларыгар, хонтуруолу күүһүрдэллэригэр көрдөстө. Итиэннэ дьоҥҥо-сэргэҕэ барытыгар этиллибит, быһаарыллыбыт ирдэбиллэри кытаанахтык тутуһуу, мааскалаах сылдьыы Дьокуускайга дьаҥы бохсорго тирэх буолуоҕун бэлиэтээтэ, ханна да бэйэ икки ардыгар социальнай дистанция тутуһуллуохтааҕын эттэ.