Коронавирус дьаҥа тарҕамматын туһугар, эргиэн уонна уопсастыбаннай аһылык тэрилтэлэрэ санитарнай, сэрэнэр дьаһаллары төһө сөпкө тутуһалларын бэрэбиэркэлиир эриэйдэлэр салгыы ыытыллаллар.
edersaas.ru
Муус устар 30 күнүттэн саҕалаан күн бүгүнүгэр диэри 22 улууска эргиэн уонна уопсастыбаннай аһылык тэрилтэлэрин бэрэбиэркэлиир 4332 көһө сылдьар эриэйдэ, ол иһигэр 2059 эриэйдэ киин куоракка, ыытылынна. Ол түмүгүнэн, 212 аах, 47 административнай быраабы кэһии дьыалатын көбүтүү уонна административнай силиэстийэни ыытыы дьыалата, административнай быраабы кэһиигэ 43 боротокуол толорулунна, 43 дьыала суут көрүүтүгэр ыытылынна. Уопсайынан ыллахха, тэрилтэлэр тустаах дьаһаллары эппиэтинэстээхтик толорор эбиттэр. Ол быыһыгар быстах кэһиилэр суох буолбатахтар. Холобур, ааспыт нэдиэлэҕэ банкеттыыр саалаҕа үс кэһии түбэлтэтэ баара булуллан, РФ КоАП 20.6.1 ыстатыйатыгар сөп түбэһиннэрэн, административнай быраабы кэһии боротокуоллара толорулуннулар.
Хонтуоруоллуур дьаһаллар салҕаналлар: ордук болҕомто ааспыт өттүгэр кэһиилэри таһааран, бэлиэҕэ ылыллыбыт тэрилтэлэргэ ууруллуоҕа.
Бары тэрилтэлэри дьаҥы бохсууга-сэрэтиигэ ирдэнэр санитарнай дьаһаллары кытаанахтык тутуһарга ыҥырабыт, нэһилиэнньэ доруобуйатын туруга уонна эргиэн, уопсастыбаннай аһылык тэрилтэлэрэ салгыы үлэлииллэрэ-үлэлээбэттэрэ онтон улахан тутулуктаах диэн Урбаан министиэристибэтэ иһитиннэрэр.
Раиса Сибирякова, «Саха сирэ» edersaas.ru