Өлөөн улууһугар урут сууттана сылдьыбатах киһиэхэ бириигэбэр таҕыста. Туох буруйу оҥорбутун иһин?
Суут быһаарбытынан, бу И. диэн киһи күһүн итирэн баран, биир билэр киһитигэр дьиэтигэр тиийэн, «миигин хоннор» диэн эппит. Онуоха анараата аккаастаабыт.
Муора тобугунан буолбут туруктаах киһи онтон иҥнибэтэх уонна хара күүһүнэн дьиэҕэ түннүгүнэн киирбит. Хаһаайын, биллэн турар, кыйдыы-үүрэ сатаабыт. Ону ыар ыалдьыт дьиэлээх киһини быһаҕынан иккитэ түөскэ анньыбыт.
Бу эрэйдээх быһахтан эмсэҕэлээн да баран, дьиэтиттэн куотан тахсан, «суһал көмөнү» ыҥырбыт. Оттон итирик буруйдаах туох да буолбатаҕын курдук, хоско киирэн утуйбут. Полицейскайдар кэлэн уһугуннарбыттарыгар, биирдэ турбут.
Суут бу киһини РФ Холуобунай кодексатын 139-с ыст. 1 чааһынан (атын киһи дьиэтигэр сокуоннайа суохтук киирии) уонна 111-с ыст. 2-с чааһын «з» пуунунан (киһи олоҕор кутталлаах ыар эмсэҕэлээһини оҥоруу) буруйдааҕынан билинэн, 4 сыл 6 ыйга усулуобунай миэрэҕэ уурда.
Бириигэбэр сокуоннай күүһүгэр киирэ илик.
Бу туһунан СӨ Борокуратууратын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.