Интэриэһинэй

«Хомусист – виртуоз мира» куонкурус түмүгүнэн тоҕус киһи виртуоз-хомусчут аатын сүгүөҕэ

Бэҕэһээ “Сахамедиа” өрөспүүбүлүкэтээҕи пресс-киинигэр «Хомусист – виртуоз мира»  аан дойдутааҕы III  куонкуруска кыттыахтаах хомусчуттар уочараттарын быһаарар тэрээһин ыытылынна. Конкуруска  аан дойду таһымнаах 38 хомусчут кыттыаҕа. Бэс ыйын 15 күнүгэр кыттар дьон бары кэриэтэ кэлбиттэр, биир киһи бүгүн кэлиэхтээх эбит. Сорохтор онлайн кыттар буоланнар, икки тус-туспа сэрэбиэй ыытылынна. Бастакынан видео-онлайн көмөтүнэн кыттар 10  хомусчут уочаратын быһаарар сэрэбиэй буолла. Ол кэнниттэн саалаҕа мустубут кыттааччылар долгуйан туран,  хаһыс кыттыахтаах уочараттарын быһаардылар.

— Күрэх икки түһүмэхтээх буолуоҕа: үгэс буолбут ньыманан уонна кыттааччы импровизацията. Дьүүллүүр сүбэ бастатан туран, оонньуур киһи дьоҕурун уонна айымньытын ис хоһоонун сыаналыаҕа. Уонна оонньооччу  истээччилэргэ хайдах дьайарын, айымньытын хайдах быһыылаахтык сайыннарарын көрө сатыахпыт. Иккис түһүмэххэ, сэрэйдэххэ, күрэхтэһээччилэр аҥаардара кэриҥэ сүүмэрдэнэрэ буолуо, ону куонкурус көрдөрүө. Муҥутаан тоҕус киһи виртуоз аатын сүгүөҕэ, өссө аҕыйах буолуон сөп, — диэн дьүүллүүр сүбэ бэрэссэдээтэлэ, Норуоттар икки ардыларынааҕы варганистар уопсастыбаларын бэрэсидьиэнэ Франц Кумпл иһитиннэрдэ. Санатар буоллахха, «Хомусист – виртуоз мира»  аан дойдутааҕы III куонкурус Дьокуускайга бэс ыйын 16-17 күннэригэр  ыытыллыаҕа.

0
0
Telegram @edersaas20