Хомус Уйбаан: Биһиги хомусчуттарбыт — композитордар

Бөлөххө киир:

Бэс ыйыгар Дьокуускайга норуоттар икки ардыларынааҕы виртуоз-хомусчуттар үһүс төгүллээх куонкурустара ыытыллыаҕа.

Бу куонкуруска бэлэмнэнии туһунан ХИФУ хотугулуу-илиҥҥи норуоттар тылларын уонна култуураларын институтун профессора, куонкуруһу тэрийээччилэртэн биирдэстэрэ Иван Алексеев-Хомус Уйбаан санаатын үллэһиннэ:

— Маннык куонкурус бастакытын 1991 сыллааха ыытыллыбыта. Оччолорго виртуоз-хомусчуттар үрдүк ааттарын Федора Гоголева, Петр Оготоев, Спиридон Шишигин, Тываттан Геннадий Чаш, Башкортостантан Роберт Загретдинов, Кыргызстантан Суйдум Толокова ылбыттара.

Эрдэ Саха сирин биир бастыҥ хомусчутунан Лука Турнин биллэрэ. 1948 сыллаахха Москва куоракка хомуска оонньоон үгүс дьону талаанынан сөхтөрбүтэ. Бэлиэтээн эттэххэ, Арассыыйа үрдүнэн Саха сиригэр уонна Башкортостаҥҥа хомус муусука инструменын быһыытынан киэҥник тарҕаммыт. Ону сэргэ, Алтайга уонна Тываҕа эмиэ оонньуур инструмент быһыытынан сайдыбыт.

Билигин хомуска үөрэтии сайдан, аныгылыы маастарыстыба эмиэ сайдар. Биһиги хомусчуттарбытын композитордар диэххэ сөп. Кинилэр саҥаттан саҥа айымньыны айаллар. Билигин хомуска оонньуурга үөрэтэр араас кинигэлэр, босуобуйалар элбэхтэр. Онон дьон талаанын арыйар кыахтанна.

Быйылгы норуоттар икки ардыларынааҕы улахан куонкуруска кыттааччыларга ситиһиини баҕарабын. Кинилэр бэйэлэрин эрэ буолбакка, бүтүн норуоттарын талаанын арыйыахтара диэн эрэнэбин.

Ульяна ЗАХАРОВА.

+1
0
+1
0
+1
0
+1
0
+1
0
+1
0
+1
0