Аан дойду 57 норуотун хомуһа түмүллэн сытар Хомус түмэлэ онлайн экскурсиялары тэрийэр буолла. Экскурсияны Zoom платформа нөҥүө ыыталлар. Дьиэҕэ олоруу кэмигэр табыгастаах ньыманы тобулбуттар.
ederasaas.ru
Биллэрин курдук, аан дойдуга соҕотох түмэл биһиэхэ – Саха сиригэр эрэ баар. Түмэл фондатыгар 57 араас норуот 1700 хомуһа түмүллэн сытар. Манна араас омуктар варганнарыттан саҕалаан, көмүс хомустарга тиийэ баара биллэр. Саамай кыра, саамай улахан хомус хас сантымыатырдааҕын, миэтэрэлээҕин, хомус маҥнай ханна баар буолбутун билэҕит дуо? Маны Саха сирин мусуойуттан эрэ билиэххэ сөп.
Экскурсияны үс бөлөххө арааран ыыталлар: саха хомуһа, аан дойду норуоттарын хомуһа, Фредерик Крейн ураты кэллиэксийэтэ. Тэрээһин 30-40 мүнүүтэ устата барар. Төлөбүрэ бэрт чэпчэки, көрөөччү ахсааныгар хаарчах суох. Кэмиттэн-кэмигэр хомуска аналлаах кылаас чаастарын даҕаны ыытыахха сөп. Сиһилии 8(4112)42-86-75 төлөпүөнүнэн билсиэххитин сөп.
Людмила ПОПОВА, “Саха сирэ” хаһыат, edersaas.ru