«Хомус кырдала-2020» норуоттар икки ардыларынааҕы күөн күрэс быйыл онлайн-эрэсииминэн барар.
Онус төгүлүн ыытыллар үбүлүөйдээх күрэскэ Францияттан, Монголияттан, Турцияттан, Москваттан, өрөспүүбүлүкэ бары улууһуттан, хаһааҥҥытааҕар да элбэх киһи кыттар диэн СӨ Култуура уонна духуобунай сайдыы министиэристибэтин пресс-сулууспата иһитиннэрэр.
Миниистири бастакы солбуйааччы Владислав Левочкин күрэс кыттыылаахтарын эҕэрдэлээн туран, хомус аан дойду норуоттарын сомоҕолуур ураты умсугутуулааҕын, кыахтааҕын эттэ. Үөрүүлээх түгэҥҥэ Уус Алдан улууһун баһылыгын бастакы солбуйааччы Петр Попов, улуустааҕы култуура управлениетын начаалынньыга Иннокентий Аммосов, «Хомус» уопсастыбаннай түмсүүнү салайар Лена Павлова, хомус аан дойдутааҕы түмэлин уонна киинин дириэктэрэ Дмитрий Бястинов кытыннылар.
Хомус күрэһэ аан бастаан 2008 сыллаахха Уус Алдан улууһугар Тулунаҕа ыытыллыбыта. Бырайыак ааптара Тандатааҕы култуура дьиэтин дириэктэрэ Альберт Находкин. Салгыы улуустааҕы, онтон өрөспүүбүлүкэтээҕи күрэстэр Уус Алдан улууһунааҕы култуура управлениетын, СӨ Култуура уонна духуобунай сайдыы министиэристибэтин өйөбүллэринэн ыытыллан барбыттара. 2015 сыллаахха аан бастаан АХШ уонна Великобританияттан кыттыылаах норуоттар икки ардыларынааҕы күрэс тэриллибитэ.
Ити курдук күөн күрэс географията сыллата кэҥээн, далааһыннанан иһэр. Оттон куонкурус бастакы хараҥаччылара номнуо бэйэлэрин ситиһиилэринэн бар дьоннорун үөрдэллэр. Ол курдук, бүгүн киэн тутта Алдан Рожины, Эркин Алексеевы, Ирина Охлопкованы уо.д.а. киэн туттан ааттыыбыт.
+1
+1
+1
+1
+1
+1
+1