Аан дойду норуоттарын хомуһун түмэлэ уонна киинэ каталог таһаарда.
Түмэл отуттан тахса сыллаах үлэтигэр аан дойду араас муннугуттан 1700 хомуһу муспут. Манна бииртэн-биир уратыны сөҕө көрөҕүн. Хас биирдии норуот, маастар бэйэтин үстүрүмүөнүн норуотун үгэһигэр, уратытыгар тирэҕирэн, олоҕуран оҥорор.
Каталогы музей кэлэктиибэ эрэдээктэрдэри, тылбаасчыттары, хаартыскаҕа түһэрээччилэри, компьютернай дизайнердары кытары көмөлөөн оҥорбуттар. Түмэл уонна СӨ Култуура министиэристибэтэ көрбүт харчытыгар, ону сэргэ «Алмаасэргиэнбаан» өйөбүлүнэн бэчээтэммит.
Барыта 628 хомус арааһа, 21 улуустан 142 маастар оҥоһуга киллэриллибит. Ону сэргэ, ханна оҥоһуллубута биллибэт 54 хомус баар. Кинигэ сэттэ бөлөҕүнэн наардаммыт: Дьокуускай куорат, Киин, Илин эҥэр, Бүлүү, Хотугу, Соҕуруу улуустар уонна ааптара биллибэт хомустар.
Ыстатыйалар, хаартыскалар болҕомтону тардаллар. Манна XVII үйэттэн билиҥҥи кэмҥэ диэри оҥоһуллубут хомустары көрүөххүт. Нуучча уонна аангылыйа тылынан тахсыбыт каталог Хомус түмэлин 30 сылыгар уонна төрүттээччи, тэрийээччи И.Е.Алексеев-Хомус Уйбаан 80 сааһын туолуутугар ананар.
Иһитиннэрбиттэринэн, үлэ салҕанар, өссө икки туом тахсара былааннанар.
+1
+1
+1
+1
+1
+1
+1