Сыллата сэтинньи 30 күнүгэр саха норуотун үгэһин, култууратын, хомуһун киэҥник тарҕатар инниттэн Саха Өрөспүүбүлүкэтигэр Хомус күнэ бэлиэтэнэр. Бу баара-суоҕа ытыс саҕа эрээри, бүтүн 200-тэн тахса норуоту түмэр, сомоҕолуур кыахтаах үстүрүмүөн дириҥ силистээх-мутуктаах.
“Саха сирэ” хаһыат, edersaas.ru
Хомус декадатыгар Саха сирин киин куоратыгар, улуустарга, нэһилиэктэргэ араас көрсүһүүлэр, куонкурустар, быыстапкалар, уо.д.а. тэрээһиннэр ыытыллыахтара. Быйылгы декада туһунан Хомус норуоттар икки ардыларынааҕы түмэлин дириэктэрэ Дмитрий Бястиновтан туоһуластыбыт. Дьэ, туох уратылаах эбитий?
Бастатан туран, Улан Батор (Монголия) Чингэлтэ оройуонун, 61-с нүөмэрдээх оскуолатын дириэктэрэ Аюш Мөнхчимэг салалтатынан 18 киһилээх дэлэгэссиийэ кэлиэҕэ. Дэлэгээссийэҕэ сүрүннээн оҕолор буолуохтара диэн дириэктэр иһитиннэрдэ. Ону таһынан, Чехия биир биллэр-көстөр хомусчута Петр Ясинчук кэлиэҕэ. Ыалдьыттар Хомус күнүн тэрээһиннэригэр сылдьыахтара, уопут атастаһыахтара.
Иккиһинэн, Монголия хэл-хууругар (тимир хомус) аналлаах аахсыйаны биллэрбиттэр. “Быйыл кыһыл Монголияҕа Хомус түмэлин уопсастыбаннай филиалын арыйбыппыт. Ол иитинэн, Саха сирин уустара монгол хомуһун оҥорууларыгар аахсыйа биллэрбиппит. Аахсыйаҕа ким баҕалаах кыттар. Бүгүҥҥүтэ 17 хэл-хууру оҥордулар”, — диэн Дмитрий Дмитриевич кэпсиир.
Үсүһүнэн, Хомус күнүгэр — сэтинньи 30 күнүгэр улуустарга, нэһилиэктэргэ хомус диктаана тэриллиэҕэ. Диктант тестирование быһыытынан ааһар. Кыттааччылар бэлэм хоруйдартан биир сөптөөҕүн талан ылаллар.
Төрдүһүнэн, оскуола үөрэнээччилэригэр ыытыллар “Чарующие звуки хомуса” өрөпүүбүлүкэтээҕи куонкурус ыыра кэҥээн, быйыл норуоттар икки ардыларынааҕы кыттыылаах ааһыаҕа. Ол курдук, Монголияттан кэлбит ыалдьыт оҕолор кыттыахтара.
Бэсиһинэн, классик суруйааччылар Алексей Кулаковскай-Өксөкүлээх Өлөксөй, А.И.Софронов-Алампа айымньыларынан режиссер Руслан Тараховскай “Өй сүрэх икки мөккүөрэ уонна ытык хайалар кэпсэтиилэрэ” диэн драматическай айымньыны туруоран, хомуһунан арыаллыахтара. Дьон сэҥээриитин ылар биир тэрээһин Олоҥхо тыйаатырыгар буолуоҕа.
Алтыһынан, Уус Алдан улууһун кытта кыттыһан “Хомус уолан” диэн 18-30 саастаах ыччакка аналлаах өрөспүүбүлүкэтээҕи куонкуруһу ыытыахтара.
Ити курдук, Хомус күнүн чэрчитинэн улуустарга өрөспүүбүлүкэтээҕи араас тэрээһиннэр буолаллар. Хомус дэкээдэтин толору бырагырааматын бу күннэргэ edersaas.ru саайтка көрөөрүҥ. Кэлиҥ! Көрүҥ! Кыттыҥ!
Людмила ПОПОВА, “Саха сирэ” хаһыат, edersaas.ru