Хомуньуустар Өктөөп үбүлүөйдээх мэтээлин атыылаабаттар, сакаастыыллар эрэ…
Дьокуускайга бу күннэргэ Ленин проспега уонна Өктөөбүрүскэй уулусса быһа охсуһар муннуктарыгар турар кыһыл кирпииччэ дьиэ үһүс этээһигэр баар хомуньуустар ыстааптарын аана сабыллыбат буолла. Ол төрүөтэ – “Улуу Өктөөп 100 сылыгар анаммыт өйдөбүнньүк мэтээли ким баҕалаахха 1-дии мөһөөххө атыылыыллар үһү” диэн батсаабынан сурах тарҕаммыта буолбут.
Ол иһин эһэлэрин-эбэлэрин, ийэлэрин-аҕаларын илдьиттэринэн мэтээл атыылаһа киирэр-тахсар эдэр киһи элбээбит. Бэйэлэрэ кыанан сылдьар сааһырбыт дьон даҕаны баһаамнар. Бүгүн күнүскү чэй иннинэ киирэ сылдьан, хас даҕаны пенсионер таска турар улахан остуол тула олорон-туран, уочаратынан ааттарын-суолларын сурунан испииһэк оҥостубуттарын көрдүм. Ыйыталаспыппар: “Киин куоракка олорор уокурукпут бэтэрээннэрин сэбиэтин аатыттан сайаапка киллэрэн эрэбит”, – дэстилэр. Онтулара мөһөөхтүү буолбакка, балтараалыы мөһөөх ытырыылаах.
Уулуссаттан киирбит киһи аайы маҕаһыыҥҥа килиэби атыылыыр курдук туттаран таһаарбаттар эбит. Улуустарга олорооччуларга нэһилиэктэр дьаһалталара эбэтэр идэлээх сойуустарын тэрилтэтэ түһэрэллэр. Киин куорат олохтоохторугар тустаах уокурук бэтэрээннэрин сэбиэтэ Дьокуускай куораттааҕы “Сэрии оҕолоро” кэмитиэккэ харчытын кытта сайаапка киллэрэр. Мэтээл сэрии бэтэрээннэригэр эрэ босхо бэриллэр. Оттон тыыл, үлэ бэтэрээннэригэр үөһэ ыйыллыбыт тэриллиилэр уйуналлар. “Балтараа мөһөөххүн төлөө – мэтээл бэлэхтиэм”, – диэн хаана хамныыр хайа да хомуньуус үрүҥ күнү утары көрөн туран этиэ суоҕа. Ити хомуньууһуму тутааччы сиэригэр сөп түбэспэт. Ол даҕаны буоллар…
РФ Хомуньуус баартыйатын Саха сиринээҕи салаатын материальнай-хаһаайыстыбаннай чааска эппиэттээх үлэһитэ Галина Слепцова этэринэн, маҥнай өрөспүүбүлүкэ үрдүнэн баар 3 тыһ. чилиэннэригэр усунуос үбүттэн сакаастаан босхо туттартаабыттар, онтон кэлин көрдөһүү элбэҕинэн 4,5 тыһ. мэтээли эбии сакаастаан атыылаһан ылбыттар. “Көрдөһөөччү, баҕалаах билигин даҕаны баһаам. Бу мэтээли биһиги баартыйабыт сакааһынан “Монетный двор” урукку Өктөөп өрөбөлүүссүйэтин уордьанын үтүгүннэрэн оҥордо. Ол иһин олус тупсаҕай көстүүлээх буолан, ымсыырааччы элбэх. Россия үрдүнэн биһиги эрэ баар буолбатахпыт. Эбии сакаастаары испииһэк хомуйа олоробут эрээри, үөһээҥилэр сөбүлэспэтэхтэринэ, дьоҥҥо харчыларын тута төннөрүөхпүт”, – диэтэ Галина Петровна.
Василий НИКИФОРОВ, edersaas.ru