Ый ахсын хамнас кэллэ да хомунаалынай хаһаайыстыба, уот-гаас төлөбүрүн көтүппэккэ эрэ төлүүр курдукпут даҕаны, бүгүҥҥү туругунан «Якутскэнерго» тэрилтэҕэ дьиэни-уоту салайар хампаанньалар, дьиэни бас билээччилэр табаарыстыбалара 600 мөл. солк. иэстээх олороллор. «Водоканалга» иэстэрэ 150 мөл. солк. тиийбит.
edersaas.ru
Бу туһунан СӨ дьиэ-уот тутуутун кэтээн көрөр судаарыстыбаннай управление салайааччыта Наталья Чусовская иһитиннэрдэ.
«2017 с. дьиэни-уоту салайар хампаанньалар нэһилиэнньэттэн хомуйбут харчыларын туох сыалга туттубуттарын чинчийэр сыалтан 57 бэрэбиэркэ оҥорбуппут даҕаны, биир да холуобунай дьыала көбүтүллүбэтэҕэ. Дьиэлээх дьон уоттарын төлөөбөккө уһата-кэҥэтэ, соһо сылдьаллар, сороҕун эрэ төлүүллэр диэн быһаарыллыбыта. Өскөтүн иэс мунньулуннаҕына, ууну, итиэннэ ититии ситимин араарыы сокуонунан бобуллар, оттон уоту биэриини хааччахтыахха сөп. Бүтүн дьиэни буолбакка, иэстэрин төлөөбөт дьон киэнин», — диэн чуолкайдаата кини.
Улахан иэс мунньуллубатын туһугар билигин дьиэ-уот кодексатын саҥа сокуонунан хомунаалынай өҥө төлөбүрүн салайар хампаанньаҕа буолбакка быһаччы уоту, ууну, гааһы, ититиини биэрэр тэрилтэҕэ төлүөххэ сөп. Өскөтүн элбэх кыбартыыралаах дьиэни бас билээччилэр уопсай мунньаҕынан өҥөнү биэрээччини кытта быһа дуогабардаһары ылыннахтарына. Оччотугар харчыны эккирэтэн кэлбит суобаһа суох салайар хампаанньалар ырыынактан барыахтара.
Ыам ыйын 10 күнүнээҕи туругунан хомунаалынай өҥө биэрээччини кытта быһа дуогабарга Нерюнгри куоракка 11 дьиэ олохтоохторо көстүлэр.
Санатан эттэххэ, от ыйын 1 күнүттэн дьиэ-уот төлөбүрэ 6% үрдүөхтээх. Дьиэ кэргэн уопсай дохуотуттан хомунаалынай төлөбүр 15% куоһарар түгэнигэр субсидия оҥороллор.
“Маны таһынан, салайар хампаанньа төлөбүрү сыыһа, эбэтэр соруйан үрдэтэн аахтаҕына, ол сууматтан 50% ыстараап быһыытынан дьиэлээх хаһаайыҥҥа төнүннэриэхтээх”, — диэн бэлиэтээтэ Наталья Григорьевна.
Марианна ТЫРТЫКОВА, «Саха сирэ», edersaas.ru