Арассыыйа Бырабыыталыстыбата ОДьКХ өҥөлөрүн төлөбүрүгэр көрүллэр субсидиялар болдьохторун уһатан биэрдэ.
edersaas.ru
Дойду салалтата пандемия кэмигэр нэһилиэнньэҕэ коронавирус инфекцията тарҕанарын бохсор итиэннэ дьоҥҥо-сэргэҕэ көмөлөһөр сыаллаах дьаһаллары ылар. Олортон биирдэстэрэ хомунаалынай өҥөҕө субсидия болдьоҕун уһатыы буолар. Ол курдук, Арассыыйа Бырабыыталыстыбата ОДьКХ өҥөлөрүн төлөбүрүгэр көрүллэр субсидиялары, пандемия кэмигэр болдьохторо бүтэр буоллахтарына, уһатар туһунан ыйааҕы муус устар 2 күнүгэр таһаарбыта.
Бу ыйаах хайдах толоруллан иһэрин туһунан «Саха Өрөспүүбүлүкэтин Субсидияларын ааҕыныстыбата» судаарыстыбаннай хааһына тэрилтэтин нэһилиэнньэни кытары үлэҕэ отделын начальнигын солбуйааччы Алена Матвеева маннык кэпсиир:
– Субсидия ааҕыныстыбата нэһилиэнньэҕэ өҥө икки көрүҥүн толорор. Бастакыта – олох-дьаһах хомунаалынай хаһаайыстыба өҥөтүн төлөбүрүгэр субсидияны биэрии буолар. Бу субсидия алта ыйга бэриллэр. Ол аата, өҥөнөн туһанар дьон сылга иккитэ биһиэхэ ирдэнэр докумуоннары илдьэ кэлэннэр, сайабылыанньа суруйан, субсидиянан туһанар болдьохторун уһаттаран иһэллэрэ.
Коронавирус дьаҥынан сибээстээн ити уларыйда. ОДьКХ өҥөлөрүн төлөбүрүгэр көрүллэр субсидия болдьоҕо муус устар ыйтан алтынньыга диэри түбэhэр буоллаҕына, ону өссө алта ыйга уһатар туһунан Арассыыйа Бырабыыталыстыбатын ыйааҕа тахсыбыта. Онно олоҕуран, субсидиянан туһаныы болдьоҕун бэйэбит уһатан биэрэ олоробут.
Инньэ гынан, бу дьаҥ кэмигэр субсидияларын болдьоҕо бүтэр дьон ону уһаттарыахпыт этэ диэн, биһиги офиспытыгар кэлэллэрэ төрүт наадата суох. Бэйэбит атын уорганнарга (ИДьМ-ҥа – сайабылыанньа биэрбит киhи прописката уларыйбытын эбэтэр уларыйбатаҕын, Росреестргэ – кыбартыыра кини аатыгар сылдьарын эбэтэр сылдьыбатын итиэннэ ЗАГС-ка – бу киhи тыыннаах дуу, суох дуу диэн) ыйытык оҥоро-оҥоро, туох да уларыйыы суох түбэлтэтигэр, субсидияны уһатабыт.
– Оччотугар субсидия ылар болдьоҕо бу атырдьах ыйыгар субсидията бэриллэн бүтэр киһи ону уһаттарыам этэ диэн эһиэхэ тиийэрэ ирдэммэт буоллаҕа.
– Оннук. Бу киhиэхэ атырдьах ыйыгар бүтэhик субсидията бэриллэн, балаҕан ыйыттан саҕалаан, олунньуга диэри уһатан биэрэбит. Кини биһиэхэ докумуон аҕалара, сайабылыанньа түһэрэрэ ирдэммэт.
– Оттон ити өҥөнөн саҥа туһанар киһи тугу гыныахтааҕый?
– Ааспыт өттүгэр субсидиянан туһамматах, саҥа туһаныахтаах дьоннор докумуоннарын дьиэҕэ олорон, электроннай киэбинэн биэриэхтэрин сөп. Ол эбэтэр судаарыстыбаннай уонна муниципальнай өҥөлөр порталларын (e-yakutia.ru) нөҥүө сайабылыанньа ыыталлар (онуоха көһүлүөк бэлиэлээх значогу талаллар). Ити порталга өҥө, чэпчэтии ханнык көрүҥнэрэ бааллара, онно туох докумуон ирдэнэрэ, сайабылыанньа хайдах толоруллара барыта сиһилии сурулла-ыйылла сылдьар. Эбэтэр биһиги сайпытыгар (www.subsidii.jku.ru) «Физическим лицам» диэн вкладканы талан, «Способ подачи» диэҥҥэ киирэн, инструкцияны көрүөхтэрин сөп. Онно эмиэ барыта баар. Оттон сайтарга киирэр кыаҕа суох киһи биһиги суһал сибээспитигэр 88002005070 нүөмэринэн эрийэн, ыйыталаһыан сөп. Барытын сүбэлээн-амалаан, ыйан-кэрдэн биэрэбит. Маннык ыарахан кэмҥэ дьон биир кыһалҕата итинник быһаарыллар.
– Оттон өҥө иккис көрүҥэ ханныгый?
– Өҥө иккис көрүҥүнэн элбэх кыбартыыралаах уопсай дьиэлэргэ хапытаалынай өрөмүөн усунуоһугар соҕотоҕун олорор, 70-нуттан үөһэ саастаах кырдьаҕастарга компенсация биэриитэ буолар. Онуоха ирдэбилэ: бу кырдьаҕас үлэлээбэт, кыбартыыра кини аатыгар сылдьар, бэйэтэ соҕотоҕун олорор эбэтэр бэйэтин курдук үлэлээбэт, 70-тан үөһээ саастаах киhини кытары эбэтэр 1-2 группалаах инбэлиити кытары бииргэ буолуохтаах.
Бу өҥөҕө муус устар 14 күнүгэр тахсыбыт өрөспүүбүлүкэ уурааҕынан, эмиэ муус устартан компенсация ылыы болдьоҕун уһатарга сайабылыанньа суруйар ирдэммэт. Кинилэр биһиэхэ баар докумуоннарынан бэйэбит бэрэбиэркэлээммит эмиэ атын уорганнарга (билигин да соҕотох олорор дуо, үлэлиир дуу, үлэлээбэт дуу, кыбартыыратын атыылаабыт дуу, суох дуу диэн) курдук ыйытыктары ыытабыт итиэннэ туох даҕаны уларыйыы суох итиэннэ усунуостарын төлүү сылдьар буоллаҕына, компенсация ааҕаммыт, сирэй счетугар ыытабыт.
Өссө биири тоһоҕолоон бэлиэтиэхпин баҕарабын: дьоннор порталга төһө даҕаны киирдэллэр, сайабылыанньаларын сатаан ыытааччылара суох. Ол иһин, аан бастаан, авторизацияланарга, ол эбэтэр тус кэбиниэт диэни астарарга сүбэлиибин.
Раиса Сибирякова, «Саха сирэ» хаһыат, edersaas.ru